Memleket basshysy Qasym-Jomart Toqaevtyń tapsyrmalaryn júzege asyrý aiasynda óńirlerinde ekonomikany ártaraptandyrý, óńdeýshi ónerkásipti damytý jáne importty almastyrý baǵytynda júieli jumystar atqarylyp keledi. Atap aitqanda, jańa óndiris oryndary, logistikalyq jáne áleýmettik nysandar paidalanýǵa berildi, dep habarlaidy Primeminister.kz.
Metall konstrýktsiiasy men beton zaýyty
Almaty oblysy Qarasai aýdanynda quny 4,7 mlrd teńge bolatyn keshen ashyldy. Jyldyq qýaty – 10 myń tonna metall konstrýktsiiasy men 300 myń m3 beton. Sonymen qatar sendvich-panelder men modýldik ǵimarattar óndiriledi. 80 jańa jumys orny ashyldy. Ónim ishki naryqta satylady jáne Qyrǵyzstan men Ózbekstanǵa eksporttalady.
Logistikalyq keshen
Almaty oblysy Qarasai aýdanyndaǵy 50 gektar aýmaqta «A» sanatyndaǵy qoima kesheniniń birinshi kezeńi iske qosyldy. Birinshi kezeńge salynǵan investitsiia kólemi – 20 mlrd teńge, (Jobanyń jalpy quny – 70 mlrd teńge). Keshen 3PL logistikalyq qyzmetterin kórsetedi, al qoimalardyń jalpy aýdany 160 myń m2-ge jetedi. Joba aiasynda 1,2 myń jumys orny ashylady, qazirgi ýaqytta 135 adam jumyspen qamtylǵan.
Túie sútinen qurǵaq untaq shyǵaratyn zaýyt
Aral qalasynda quny 3 mlrd teńge bolatyn keshen iske qosyldy (onyń 1,8 mlrd teńgesi «Ónerkásipti damytý qory» arqyly jeńildetilgen qarjylandyrý). Jylyna shamamen 400 tonna ónim óndiriletin bul zaýytta 23 adam turaqty jumyspen qamtylady. Kásiporyn jergilikti mal ósirýshilerden táýligine 20 myń litrge deiin shikizat óńdeidi.
Joǵary surypty as tuzyn óndirý zaýyty
Aral qalasynda quny 1,8 mlrd teńge bolatyn joǵary surypty as tuzyn óndiretin kásiporyn ashyldy. Jyldyq óndiristik qýaty 40 myń tonna. 20 turaqty jumys orny ashyldy. Ónim ishki naryqty qamtamasyz etip, kórshiles elderge eksporttalady.
Laminat óndiretin zaýyt
Túrkistan oblysyndaǵy «Turan» AEA-da quny 5 mlrd teńge bolatyn laminat óndiretin zaýyt iske qosyldy. Birinshi kezeńde ishki naryq úshin jylyna 840 myń m2 laminat óndiriledi jáne 65 jumys orny ashyldy. Ekinshi kezeń iske qosylǵannan keiin óndiristik qýat jylyna 2,4 mln m2-ge deiin artyp, jumys oryndarynyń sany 150-ge jetedi.
Dene shynyqtyrý-saýyqtyrý kesheni
Aqtóbe oblysy Alǵa aýdanynda jalpy aýmaǵy 3 myń m2 bolatyn júzý basseini men fýtbol alańy bar dene shynyqtyrý-saýyqtyrý kesheni paidalanýǵa berildi. Nysan táýligine 150 adamǵa deiin qabyldai alady jáne aýyl jastarynyń buqaralyq sportpen ainalysýyna múmkindik beredi.
Atyraý – Batými áýe baǵyty
Qazaqstan men Grýziia arasynda turaqty tikelei áýe reisi iske qosyldy. Reister aptasyna bir ret – seisenbi kúnderi Airbus A320 áýe kemelerimen oryndalady. Jańa baǵyt halyqaralyq áýe qatynasyn keńeitip, óńirlerdiń týristik áleýetin damytýǵa yqpal etedi.
