Shekara zastavalaryna batyrlardyń esimin berý múmkindigi týraly máseleni egjei-tegjeili zerdeleý úshin UQK Shekara qyzmetine múddeli memlekettik organdarmen birlesip belgilengen tártippen tiisti jumys júrgizý tapsyryldy. Bul týraly premer-ministrdiń orynbasary Erbolat Dosaevtyń depýtattyq saýalǵa bergen jaýabynda aitylady, - dep habarlaidy Tengrinews.kz tilshisi.
Eske sala keteiik, osyǵan deiin depýtattar shekara zastavalaryna batyr babalarymyzdyń esimderin berý máselesin kótergen edi. Olardyń aitýynsha, bul shekarashylardy batyr babalardyń uly rýhynda tárbieleýge úles qosady jáne olardyń esimderin qazaq halqynyń tarihynda máńgi este saqtaýǵa oń yqpal etetini sózsiz.
Memlekettik menshik obektilerine, onyń ishinde shekara zastavalaryna ataýlar berý tártibi Úkimettiń 1996 jylǵy 5 naýryzdaǵy № 281 qaýlysymen bekitilgen tiisti Qaǵidalarmen (budan ári - Qaǵidalar) aiqyndalatyny aitylady.
"UQK Shekara qyzmetiniń málimeti boiynsha, shekara zastavalarynyń jalpy sanynyń 10-yna ataý berilip qoiǵan. Jergilikti atqarýshy organdar qoldaǵan Parlament Májilisiniń depýtaty Baqytbek Smaǵuldyń Qyzylorda oblysyndaǵy "Qyzylqum" shekara zastavasyna Janqoja batyrdyń atyn berý týraly bastamasy Úkimettiń 2017 jylǵy 3 sáýirdegi №157 qaýlysymen iske asyrylǵany ózderińizge belgili", - delingen Dosaevtyń jaýabynda.
Sondai-aq, Erbolat Dosaev qaǵidalarǵa sáikes, memlekettik menshik nysandaryna ataý berý kezinde birqatar talaptyń eskeriletinin aityp ótti.
"Onyń ishinde tarihi, geografiialyq jáne mádeni erekshelikter, ádebi til normalaryna sáikestik, asa kórnekti memleket jáne qoǵam qairatkerleriniń, ǵylym, mádeniet qairatkerleriniń jáne Qazaqstan Respýblikasy men qoǵam aldynda eńbek sińirgen basqa da jeke adamdardyń esimderin berý", - dep jaýap berdi ol depýtattyq saýalǵa.
.jpeg)