Elimizdiń 6 óńirinde qandastarǵa kómek kórsetetin front-keńseler ashylady. Bul týraly halyqqa esep berý kezdesýinde QR Aqparat jáne qoǵamdyq damý ministri Aida Balaeva aitty, dep habarlaidy "Ult aqparat".
«Qoǵam úshin erekshe mańyzy bar taǵy bir baǵyt – qandastar máselesi. Ózderińizge málim, Qazaqstan sheteldegi diasporasyn Otanyna shaqyrǵan álemdegi sanaýly memleketterdiń qatarynda. Bul maqsatta, ministrlik janynan «Otandastar» qory qurylyp, naqty jobalar júieli júrgizilip keledi. Búginde álemniń 12 elindegi qazaq qaýymdastyǵynyń suraýymen qazaq tilin oqytatyn 31 onlain synyp jumys jasaidy. Mádeni-gýmanitarlyq bailanysty kúsheitý maqsatynda 5 memlekette «Abai Uii» qazaq mádeni-iskerlik ortalyqtary ashyldy», - dedi ministr.
Onyń atap ótýinshe, elge oralǵan qandastardy jańa ortaǵa beiimdeý jumysy da bir júiege keltirildi. Qandas mártebesi men azamattyq alý rásimin jeńildetetin «bir tereze» printsipi jobasy búginde tolyq pysyqtaldy. Atalǵan protsedýra Halyqqa qyzmet kórsetý ortalyqtary arqyly jaqyn arada qoljetimdi bolady.
«Elimizdiń 10 óńirinde «Otandastar» qorynyń front-ofisteri jumys isteýde. Taǵy 6 óńirde front-ofister ashylady. Ortalyqta jańadan elge kelgen qandastarǵa durys qujat rásimdeýden bastap olardy memlekettik qoldaýdyń barlyq suraqtary boiynsha quqyqtyq, aqparattyq kómek beriledi. Byltyr 5 myńnan astam ótinishke naqty kómek kórsetildi. Jalpy, osynaý saýaby mol abyroily mindettiń údesinen shyǵý úshin ministrlik institýtsionaldyq turǵydan da, quqyqtyq baǵytta da qyzmet etýge qashanda daiar. Dese de, bul jumysta eń bastysy – dúnie júzine tarydai shashylǵan qandastarymyzdy elge kóshirý ǵana emes, olardyń álemniń qai túkpirinde júrse de ulttyq múddelerin qorǵaý, qamqor bolý», - dedi Aida Balaeva.
