QR Ekologiia, geologiia jáne tabiǵi resýrstar ministri Maǵzum Myrzaǵaliev IX Azamattyq forýmda jańa Ekologiialyq kodekstiń mańyzdy baǵyttaryn túsindirdi, dep habarlaidy QazAqparat.
«Qorshaǵan ortanyń jai-kúiin jaqsartý maqsatynda Elbasy men Qazaqstan Prezidentiniń tapsyrmasymen EYDU-ǵa múshe elderdiń tásilderi negizinde Ekologiialyq kodekstiń jańa jobasyn ázirledik. Joba belsendi talqylaý kezeńinen ótti. Oǵan 2 myńǵa jýyq túzetý kelip tústi, 40-50%-ǵa ózgertildi jáne onda 7 negizgi baǵyt kózdelgen», - dedi ministr.
Eń aldymen atmosferalyq aýanyń, sýdyń, topyraqtyń lastanýy máselesin sheshý úshin ónerkásipterge eń ozyq qoljetimdi tehnologiialardy (OQT) engizý kózdelgen.
«Eýropada ozyq qoljetimdi tehnologiialar arqasynda shyǵyndylar 94%-ǵa tómendedi. Bul jumys 15 jylǵa sozylǵan. OQT engizgen kásiporyndar emissiia tóleminen bosatylady. Eger kásiporyndar OQT paidalanbasa, emissiia úshin tólem stavkalary anaǵurlym artady. Iaǵni, memleket shyǵyndardy tabiǵat paidalanýshylarmen bólisedi», - deidi M. Myrzaǵaliev.
Qaldyqtardyń jinalýyn azaitý úshin WASTE TO ENERGY tehnologiiasymen qaldyqtardy energetikalyq kádege jaratý engiziledi. Qoqys órtelip, elektr qýaty óndiriledi jáne ol jalpy elektr jelisine satylady.
«Jaqynda ǵana Memleket basshysy tiisti zań jobasyna qol qoidy. Qazirgi ýaqytta biz 6 pilottyq qalany anyqtadyq, olar – Aqtóbe, Almaty, Atyraý, Nur-Cultan, Taraz jáne Shymkent. Ákimdiktermen jer ýchaskeleriniń, infraqurylymnyń bolýy jáne kepildendirilgen qaldyq júktemesi máseleleri pysyqtalýda. Pilottyq jobalar tabysty iske asqan jaǵdaida bul tájiribe basqa qalalarǵa da taratylady. Osy tehnologiianyń arqasynda 2025 jylǵa qarai qaita óńdeý deńgeiin 30%-ǵa, iaǵni orta eýropalyq deńgeige jetýdi boljap otyrmyz», - dep túsindirdi ministr.
