Elimizde múmkindigi shekteýli jandardyń 100 myńy jumys isteidi. Bul týraly QR Eńbek jáne halyqty áleýmettik qorǵaý ministrliginen málim boldy, dep habarlaidy QazAqparat.
«Múgedektigi bar azamattar, basqa da osal áleýmettik toptardyń ókilderi siiaqty, memlekettik baǵdarlamaǵa qatysýda basymdyqqa ie. Bizdiń elimizde 700 myńnan astam múgedektigi bar adam turady, olardyń jartysynan kóbi eńbekke qabiletti jasta. Alaida, olardyń ishinde resmi málimetter boiynsha, shamamen 100 myń adam jumys isteidi. Sondyqtan múgedekterdi eńbek naryǵyna beiimdeý mańyzdy ári ózekti másele bolyp tabylady», – dep atap ótti QR Eńbek ministrligi Halyqty jumyspen qamtý departamenti Eńbek naryǵyn damytý basqarmasynyń basshysy Baqyt Qashyrbekov.
Budan buryn habarlanǵandai, biyl Qazaqstan boiynsha «Eńbek» baǵdarlamasyna 526 myńnan astam adam qatysyp, túrli qoldaý túrlerin aldy. 338,2 myń adam jumysqa ornalastyryldy, onyń ishinde 189,4 myńy turaqty jumysqa, memleket sýbsidiialaityn jumys oryndaryna 187,3 myń adam jumysqa ornalastyryldy, 9,6 myń jeńildikti kredit jáne 38 myń qaitarymsyz grant berildi, «Bastaý Biznes» jobasy boiynsha kásipkerlik negizderine qysqa merzimdi oqytýdan 33,2 myń adam ótti.
Óz kezeginde, osy memlekettik baǵdarlama aiasynda qoldaý alǵan múgedektigi bar adamdardyń jalpy úlesi nebári 2,1 paiyzdy – 11,4 myń azamatty quraidy. Onyń ishinde 4 myńy turaqty jumys oryndaryna, 6 myńnan astamy ýaqytsha jumysqa ornalastyryldy, 448 azamat qysqa merzimdi kásiptik oqytýmen qamtyldy, 284 adam mikrokredit aldy jáne 700 adam memlekettik grant aldy. Al 504 adam «Bastaý Biznes» jobasy boiynsha kásipkerlik qyzmet negizderine oqytýǵa jiberildi.
