Bilim jáne ǵylym ministri Ashat Aimaǵambetov alǵashqy qońyraý saltanatty sharasyna qatysý úshin Qosshydaǵy №2 orta mektepke bardy, dep habarlaidy "Ult aqparat".
"Qurmetti ustazdar, oqýshylar jáne ata-analar. Bilim kúnimen quttyqtaimyn. Pandemiiaǵa bailanysty 1,5 jyldai qashyqtan oqýǵa týra keldi. Biylǵy oqý jylyn dástúrli túrde oqýdyń sáti tústi. Jalpy el boiynsha 7500 mektepte 3 mln 600 bala jańa oqý jylyn bastap otyr. 1 qyrkúiek, ásirese mektep tabyldyryǵyn alǵash attap otyrǵan búldirshinder úshin erekshe. Qashyqtan oqý bilim alý protsesiniń mańyzy men ondaǵy muǵalimniń rólin aiqyn kósetip berdi. Bizdiń ustazdar pandemiiaǵa qaramastan onlain formatqa tez beiimdelip balalarymyzǵa bilim berdi. Biylǵy oqý jylynyń taǵy bir ereksheligi, 1 synypqa Álippeni qaitaryp otyrmyz. Álippeniń negizi ult ustazy Ahmet Baitursynulynyń ádistemesine sai qalanǵan. Bul burynnan bar dúnie biz ony jańǵyrtyp otyrmyz. Osylaisha elimizdegi barlyq búldirshinder alǵash ret Álippeni qoldaryna ustap otyr. Jańa oqý jyly tabysty bolsyn", - dedi Aimaǵambetov saltanatty sharada.
Tselinograd aýdandyq bilim bóliminiń basshysy Qanat Ahmetovtyń aitýynsha, jańa oqý jylynda qaladaǵy birinshi synyp oqýshylarynyń sany 1000-nan asqan.
"2021 jyly Qosshy qalasyndaǵy Raqymjan Qoshqarbaev atyndaǵy №1 mektepte birinshi synyp oqýshylary - 385. № 2 orta mektepte - 635 birinshi synyp oqýshysy, "Dara" biznes akademiiasy" mektep-litseiinde - 96 birinshi synyp oqýshysy bar.
Jalpy, biyl qaladaǵy birinshi synyp oqýshylarynyń sany - 1116 bala. Bul byltyrǵymen salystyrǵanda kóp. Byltyr Lesnaia polianadaǵy mektepte 480 birinshi synyp oqýshysy boldy. Birinshi mektepte 320 bala boldy", - dedi Qanat Ahmetov.
Onyń aitýynsha, Lesnaia polianadaǵy mektepte biyl birinshi synyp oqýshylarynyń kóptigine bailanysty 1 "Y" synybyn ashýǵa týra kelgen. Mektepte barlyǵy 26 birinshi synyp bar.
Al Qazaqstan boiynsha birinshi synypqa 394 myńǵa jýyq bala barǵan.
Aita keteiik, jergilikti muǵalimder 2019 jyly Memleket basshysy Qasym-Jomart Toqaevtyń aldynda Qosshy mektepterindegi oryn tapshylyǵy máselesin kótergen bolatyn.
Biyl Nur-Sultannan 20 shaqyrym jerde ornalasqan Qosshy aýyly oblystyq mańyzy bar qalaǵa ainaldy.
