Aýyl sharýashylyǵy ministri Erbol Qarashókeev qant óndirýshilerimen kezdesti. Bul týraly QazAqparat AShM silteme jasap habarlaidy.
Ministr Qazaqstannyń ońtústik óńirlerine (Almaty, Túrkistan jáne Qyzylorda oblystary) jumys sapary aiasynda Almaty oblysynyń qant jáne qant qyzylshasyn óndirýshilermen kezdesti. Kezdesý Kóksý qant zaýyty bazasynda ótti, onda ministrge qaita óńdeý jelisi kórsetilip, jańǵyrtý jumystary jáne óndiristi ulǵaitý josparlary týraly aityldy.
Qant qyzylshasyn óndirýshilermen kezdesý kezinde Erbol Qarashókeev qant salasyn damytý úshin ministrlik egis alqaptaryn ulǵaitýdy yntalandyratynyn, aýyl sharýashylyǵy taýaryn óndirýshilerge tuqym, tyńaitqyshtar men gerbitsidter, tehnika satyp alýǵa jumsalǵan shyǵyndardy óteý kózdelgenin aitty. Sondai-aq, salany tehnologiialyq qaita jaraqtandyrý úshin investitsiialyq sýbsidiialar men ainalym qarajatyn tolyqtyrýǵa jeńildikti kredit beriletinin atap ótti.
AÓK damytý jónindegi ulttyq jobaǵa sáikes, qolda bar qant zaýyttaryn jańǵyrtý jáne otandyq qantpen qamtamasyz etilý deńgeiin 80% deiin arttyrý josparlanyp otyr.
Atalǵan máseleni jan-jaqty sheshý úshin ministrlik Premer-Ministrdiń tapsyrmasy boiynsha qant jáne qant qyzylshasyn óndirý tujyrymdamasyn ázirleýge kiristi.
Óz kezeginde óndirýshiler taýarlyq-materialdyq qundylyqtar baǵasynyń ósýine, otandyq shikizat óndirisiniń kólemin ulǵaitýǵa, sý únemdeý tehnologiialaryn engizýge qatysty suraq qoidy.
Kezdesý qorytyndysy boiynsha qant jáne qant qyzylshasyn óndirýshiler ózderiniń naqty usynystaryn daiyndaýǵa kelisti. Ministrlik ony muqiiat qarap, qajet bolǵan jaǵdaida qant jáne qant qyzylshasyn óndirý tujyrymdamasynyń jobasyna engizetin bolady.
Vedomstvo basshysy «Hilnichenko jáne K» komandittik seriktestiginde bolyp, diirmendi, sút-taýar fermasyn jáne qaita óńdeý tsehtaryn aralap kórdi. Sonymen birge fermerlermen kóktemgi egis jumystaryna daiyndyq máselelerin, salany damytýdy, ministrliktiń aralasýyn talap etetin aǵymdaǵy júieli problemalardy talqylady.
Ministrdiń ońtústik óńirlerge jasalǵan úsh kúndik jumys saparynyń qorytyndysy Úkimetke jetkizilip, agroónerkásiptik keshendi odan ári damytý boiynsha usynystar muqiiat taldanyp, daiyndalatyn bolady.
