Senator Muhtar Qul-Muhammedtiń tóraǵalyq etýimen Halyqaralyq qatynastar, qorǵanys jáne qaýipsizdik komitetiniń keńeitilgen otyrysy boldy, dep habarlaidy "Ult aqparat".
Senat baspasóz qyzmetiniń málimetinshe, kezdesýge qatysýshylar Tótenshe jaǵdailar ministrligi men jekelegen óńirlerdiń kúshteri men quraldarynyń kóktemgi sý tasqyny kezeńine daiyndyǵyn talqylady.
«Qazaqstanda árbir kóktem aitarlyqtai sý tasqynymen qatar júredi. Ásirese aýyl halqy zardap shegedi. Memlekettik organdar jyl saiyn tótenshe jaǵdaiǵa daiyndyq týraly esep beredi, biraq úlken sý kelgende, árqashan kúsh pen qarajat jetkiliksiz ári daiyndyq ta nashar bolyp shyǵady», - dedi Muhtar Qul-Muhammed.
Ol sondai-aq senatorlar ótken jyly sý qaýipsizdigi týraly Úkimet saǵatyn ótkizý kezinde sý tasqyny qaýpiniń aldyn alý jónindegi naqty sharalar usynǵanyn eske saldy.
Tótenshe jaǵdailar ministri Iýrii Ilin ministrlik 2017 jyly ákimdiktermen birlese otyryp, kóktemgi sý tasqynyna asa beiim 905 eldi mekendi anyqtaǵanyn atap ótti. Búgingi kúni elimizdegi 315 eldi mekennen mundai qaýip alynyp tastaldy jáne taǵy 314 eldi mekenge qaýip-qater barynsha azaityldy. Olarda 350 myńnan astam adam turatyn 70 myńnan astam turǵyn úi bar.
Ministrdiń aitýynsha, sheshilmegen máselelerdiń biri – sý sharýashylyǵy qurylystarynyń jai-kúii bolyp otyr. Osyndai 500-ge jýyq gidrotehnikalyq qurylystar qazir jóndeýdi jáne jańǵyrtýdy talap etedi.
Kezdesý barysynda sharaǵa qatysýshylar sý tasqyny qaýpimen kúreske oń áser etetin birqatar naqty mindetterdi sheshý qajettigin atap ótti. Atap aitqanda, sýdan qorǵaý aimaqtary men beldeýleri mańaiynda ornalasqan úiler men nysandardyń sýda qalýyna jol bermeý úshin eldi mekender qurylysyn josparlaýdy jaqsartý asa mańyzdy. Joldardy jobalaý, salý, jańǵyrtý, jóndeý jáne paidalaný kezinde tabiǵi-klimattyq faktorlar da eskerilgeni jón. Odan basqa, kóp salaly zertteýler júrgizilýi tiis jáne bógetterdiń qaýipsizdigi deklaratsiiasyn ázirleýdi qarjylandyrýdy bólý kerek.
