Elimizdiń ǵylymi áleýetiniń tómendigi ǵalymdardyń jalaqysyna bailanysty boldy. Bul týraly búgin Úkimet otyrysynda QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Ǵylymi áleýettiń tómendigi ǵalymdardyń jalaqysyna bailanysty boldy. Ǵalymdarda turaqty jalaqy bolmady. Jalaqy úsh jylda bir ret qana ótkiziletin konkýrstarda jeńiske jetken jaǵdaida ǵana tólenetin. Al ulttyq sipattaǵy irgeli zertteýlermen, iaǵni, tilge, ádebietke, tarihqa, filosofiiaǵa qatysty zerteýlermen ainalysatyn institýttardyń jaǵdaiy múldem qiyn edi. Olar konkýrstardan grantty jetkilikti deńgeige jeńbegenine bailanysty turaqty jalaqy men turaqty zertteýler júrgizýge múmkindik bolmady. Ǵalymdar bul máseleni uzaq jyldar kóterdi. Memleket basshysynyń Joldaýda bergen tapsyrmasynyń arqasynda «Ǵylym týraly» zańǵa ózgerister enip, bul másele tolyǵymen sheshimin tapty. Nátijesinde tórt myńnan astam ǵalym turaqty jáne úzdiksyz jalaqy alatyn boldy. Iaǵni, endi elimizge qajetti zertteýlerdi úzdiksiz ótkizetin múmkindik paida boldy», - dedi ol.
Ministrdiń atap ótýinshe, elimizde 22 655 ǵylymi kadr bar. Onyń 36 paiyzy - 35 jasqa deiingi jas ǵalymdar, 39 paiyzy - orta jastaǵylar.
«Iaǵni, aitarlyqtai ǵylymi áleýet bar. Biraq, ǵalymdardyń jalpy sanyn alsaq, elimizdiń bir million halqyna shaqqanda bir myńnan astam ǵana ǵalym keledi. Bul óz kezeginde qarjylandyrýǵa da bailanysty. Álemdik tájiribede ǵylymdy qarjylandyrý kem degende jalpy ishki ónimniń bir paiyzy kóleminde bolý qajettigi aitylady jáne onyń basym bóligi jeke investitsiiadan qalyptasýy tiis. Osy baǵytta jumys júrgizip jatyrmyz», - dedi Ashat Aimaǵambetov.
