Elordada «Qazaqstannyń 100 jańa esimi» jobasynyń úshinshi kezeńi ótip jatyr, dep habarlaidy QazAqparat tilshisi.
«Qazaqstannyń 100 jańa esimi» jobasyna orai uiymdastyrylǵan saltanatty jiynda jeńimpazdardyń biri - elordadaǵy 54-shi mekteptiń direktory Shákárim Seisembai sóz bastady.
Ol - elimizdegi eń jas mektep direktory.
«Bizdiń mektebimizde 213 qyzmetker, 2700 oqýshy bar. Ustazdyq qyzmettegi maqsatym – memleketimizdiń bilim salasyn brendke ainaldyryp, mártebesin arttyrý. Qazirgi tańda ókinishke qarai, jastardyń ishinde, bilimdi azamattardyń arasynda mektepke baryp, ustaz bolyp bilim berý – úrdiske ainalmaǵan. Al bizdiń negizgi bailyǵymyz – jer astyndaǵy altyn emes, halqymyzdyń ushan-teńiz bilimi. Sol sebepten, bizge myqty ustazdar kerek. Sebebi, hannyń da, qaranyń da ómirlik ustazdary bolǵan», - dedi ol.
Shákárim Seisembai Maǵjan Jumabaevtyń «Alty alashtyń basy qosylsa – tórdegi oryn ustazdiki» degen sózin eske saldy.
«Bizdiń mektepterge belgili bir balans kerek. Iaǵni, er muǵalimderdiń sanyn arttyrý kerek. Mektep – otbasy sekildi. Januiada ákeden, anadan tárbie kórgen bala jaman bolmaidy. Sondyqtan, er azamattardy mektepke qyzmetke shaqyramyn. Osy biregei joba aiasynda jastarǵa oi salyp, ustazdyq mártebesin arttyramyn degen úmitim bar», - dedi ol.
Aita ketsek, «Qazaqstannyń jańa esimderi» jobasynyń maqsaty - táýelsizdik jyldary Qazaqstannyń damýyna eleýli úles qosqan adamdardyń tarihy mysalynda tabystylyq, básekege qabilettilik, pragmatizm jáne bilimge tabyný ideialaryn ilgeriletý. Biyl jobaǵa qatysý úshin 1673 anketa qabyldanǵan. Jalpy, barlyq qatysýshyǵa 700 myńnan asa daýys berilgen. Barlyq kezeńniń qorytyndysy boiynsha biyl 32 jeńimpaz anyqtaldy.
.jpeg)