Qazirgi tańda densaýlyq saqtaý júiesine qatysty syni aqparattar kún saiyn azaiyp keledi. Bul týraly Ortalyq kommýnikatsiialar ortalyǵynda ótken onlain brifingide QR Densaýlyq saqtaý ministrliginiń resmi ókili Baǵdat Qojahmetov aitty, dep habarlaidy QazAqparat.
«Osydan 2 ai buryn Densaýlyq saqtaý ministri Aleksei Tsoi Úkimet otyrysynda BAQ jáne áleýmettik jelilerde densaýlyq saqtaý júiesine qatysty jaǵymsyz aqparattar sany 10%-dan tómen bolýy kerek degen mindet qoiǵan bolatyn. Bul baǵyt boiynsha jumys júrgizilýde. Qazirgi tańda densaýlyq saqtaý júiesine qatysty syni aqparattar kún saiyn azaiyp keledi. Biz áleýmettik jelilerde belsendi bolyp, azamattardyń suraqtaryna jaýap berýdemiz. Kún saiyn media saraptama jasap otyramyz. 10% týraly aitýǵa áli erte, árine. Bul jerde áńgime densaýlyq salasy týraly jaǵymsyz aqparatty azaitý emes, másele – densaýlyq saqtaý ministrliginiń jumysyn jaqsartý», - deidi QR Densaýlyq saqtaý ministrliginiń resmi ókili Baǵdat Qojahmetov.
Onyń aitýynsha, densaýlyq saqtaý salasynyń bedeline áser etetin faktor kóp.
«Mysaly, pandemiia Qazaqstan úshin ǵana emes, basqa memleketter úshin de kútpegen jaǵdai boldy. Bul dertten qaitys bolǵandar, emdelgennen keiin qandai asqynýlar bolýy múmkin ekenine bailanysty áli de zertteý túsý kerek jaǵdailar bar. Álem boiynsha bolyp jatqan bul jaǵdaiǵa qandaida bir áser ete alýymyz qiyn. Jaqyn arada koronavirýsqa qarsy vaktsina shyǵyp, ony barynsha tiimdi emdeý joldary belgili bolady dep úmittenemiz», - deidi ol.
