Jyl basynan beri jumysynan aiyrylǵan jaǵdaida Memlekettik áleýmettik saqtandyrý qorynan áleýmettik tólem alýshylardyń sany 82,1 myńǵa jetti. Bul rette 10 489 azamatqa tólem qazan aiynda taǵaiyndaldy, dep habarlaidy "Ult aqparat".
Qoldanystaǵy zańnamaǵa sáikes jumystan bosatylǵan qyzmetkerler mindetti áleýmettik saqtandyrý júiesine qatysý ótiline jáne sońǵy 24 aidaǵy tabysyna bailanysty 1 aidan 6 aiǵa deiin jumysynan airylýy boiynsha áleýmettik tólem alady. Bul jóninde Eńbek jáne halyqty áleýmettik qorǵaý ministrliginiń baspasóz qyzmeti málimet taratty.
Tólem joǵalǵan kiristiń 40%-yna deiingi mólsherde MÁSQ qarajaty esebinen tólenedi.
Tólem taǵaiyndaý úshin jumystan bosatylǵan qyzmetkerge:
- Egov.kz portalynda avtorizatsiialaný;
- «Jumysqa ornalastyrý jáne jumyspen qamtý» bóliminde «Jumys izdeýshi adamdardy tirkeý» qyzmetin tańdaý;
- Onlain-qyzmetke tapsyrys berip, barlyq joldardy toltyrý jáne oǵan ETsQ-men qol qoiyp, ótinimdi jiberý qajet;
- Bir kún ishinde turǵylyqty jerińizdegi halyqty jumyspen qamtý ortalyǵy bos jumys oryndaryn usynady;
- Eger jumys tabylmasa, 3 jumys kúni ishinde qashyqtyqtan jumyssyz mártebesi beriletin bolady (qajet bolǵan jaǵdaida qosymsha aqparat jinaý úshin sizge HJQO qyzmetkeri habarlasady);
Jumyssyz retinde tirkelý týraly málimet bolǵan kezde Eńbekmininiń aqparat júiesi proaktivti formatta tólem taǵaiyndaý boiynsha qyzmet kórsetýge kelisý úshin mobildi telefonǵa SMS-habarlama jiberedi.
Kelisken jaǵdaida SMS-habarlamaǵa jaýap berý qajet. Tólem avtomatty túrde taǵaiyndalady.
Esterińizge sala keteiik, MÁSQ qarajaty esebinen jumysynan aiyrylǵan jaǵdaida tólenetin áleýmettik tólem jumystan shyǵý sebepterine qaramastan júzege asyrylady jáne jumyssyz adam jumys izdegen kezeńde ony qoldaýǵa arnalǵan.
