2020 jyldyń qańtar aiynda elimizdiń jeńil ónerkásibi salasyndaǵy óndiris kólemi 8,7% ósti, dep habarlaidy "Ult aqparat" QR IIDM baspasóz qyzmetine silteme jasap.
Jeńil ónerkásip salasynyń ishinde, toqyma buiymdary óndirisi 8,7%, kiim-keshek óndirisi 5,2%, sondai-aq bylǵary jáne oǵan jatatyn ónimder óndirisi 5,9% ósim kórsetti.
«Bul ósimge maqta talshyǵy, daiyn toqyma buiymdary, syrtqy kiim, aiaq kiim óndirisin ulǵaitý, sondai-aq «Bal tekstil» JShS kilem jáne kilem buiymdary óndirisi boiynsha úshinshi tsehyn, «QazProdGroup» JShS aiaq kiim óndirisin, «EKOHIM» JShS jipter, sintetikalyq jipter, baýlar, jelilerdi órý, arqan-jip buiymdaryn óndirý jobalaryn 2019 jyly iske qosý esebinen barlyq kishi salalarynda baiqaldy», delingen habarlamada.
Búgingi tańda jeńil ónerkásip salasyn damytý – basym baǵyttardyń biri bolyp otyr. Óitkeni, salanyń halyqty jumyspen qamtýda áleýmettik mańyzy zor.
2015-2019 jyldary Indýstriialandyrý kartasy aiasynda jalpy somasy 19 mlrd teńgeniń 22 jobasy iske qosyldy. 1 732 jumys orny ashyldy. Jeńil ónerkásip óndirisi kólemi 2015 jyly 71,6 mlrd teńge bolsa, 2019 jyly ol 112,7 mlrd teńgege jetti.
Sonymen qatar, «Qarapaiym zattar ekonomikasyn» nesieleý tetigi aiasynda ekinshi deńgeili bankter 6,6 mlrd teńge somasyna 30 jeńil ónerkásip jobasyn maquldady.
«Qazirgi ýaqytta jeńil ónerkásip kásiporyndaryn qoldaý ónim eksportyn damytý, eńbek ónimdiligin arttyrýdy yntalandyrý, taýarlardy ishki naryqqa ilgeriletý, «Biznestiń jol kartasy 2020« baǵdarlamasy siiaqty óńdeý ónerkásibin damytýǵa baǵyttalǵan júieli sharalar sheńberinde kórsetiledi. Budan basqa, ministirlik Jeńil ónerkásipti damytý jónindegi 2019-2021 jyldarǵa arnalǵan jol kartasyn ázirlep, ony Úkimet maquldady», delingen habarlamada.
Jeńil ónerkásibiniń taýarlary 2019 jylǵy 1 shildeden bastap memlekettik satyp alýlar aldyn ala biliktilik suryptaýmen konkýrs tásilimen ótkiziletin taýarlar, jumystar men qyzmetter tizbesine engizildi. Memlekettik satyp alýda aldyn ala biliktilik irikteýden ótken kezde Indýstriialyq sertifikat berý qarastyrylǵan.
Budan bólek, kiim men aiaq kiimdi mindetti tańbalaý jáne baqylaý boiynsha pilottyq joba iske qosyldy. Qazirgi ýaqytta osy baǵytta jol kartasy men ádistemelik usynystar ázirlendi.
«Qazir maqta-toqyma klasterin qurý boiynsha Jol kartasy ázirlendi. Ol maqta talshyǵyn qaita óńdeýdi 2 ese ulǵaitýdy kózdeidi. Sondai-aq jeńil ónerkásip kásiporyndary paidalanatyn shikizatqa (matalar, jipter, fýrnitýra jáne t.b.) kedendik ákelý bajdaryn tómendetý máselesin sheshý mindeti tur», delingen habarlamada.
