Foto: pixabay.com
Májilis depýtaty Magerram Magerramov kámelet jasyna tolmaǵandar úshin qylmystyq jaýapkershilikti 14-ten 12 jasqa deiin tómendetýdi usyndy.
Depýtat óz saýalynda Ulybritaniiany mysalǵa keltirip, atalǵan elde kámeletke tolmaǵandarǵa qylmystyq jaýapkershilik jasynyń qaita qaralǵanyn aitty. Onyń aitýynsha, balalardyń qoǵamǵa beiimdelý protsesi mektepten bastalady. Osy oraida óskeleń urpaqtyń destrýktivti minez-qulqynyń aldyn alýda ustazdardyń yqpaly zor.
«Zorlyq-zombylyqty túp-tamyrymen joiý qajet, ókinishke qarai, kámeletke tolmaǵan agressorlar jas erekshelikterine bailanysty jazasyz qalyp jatyr. Bálkim, Ulybritaniianyń úlgisi boiynsha, bizge de qylmystyq jaýapkershilikke tartylatyn jas shegin qaita qaraýymyz kerek shyǵar. Keibir qylmys túrlerin, mysaly zorlaý faktisi boiynsha jaýapkershilikti 14 jastan emes, 12 jastan bastap qarastyrý», - dedi M.Magerramov depýtattyq saýal joldai otyryp.
Onyń paiymdaýynsha, bul máselede halyqaralyq tájiribege júgingen jón.
«Mysaly, Japoniiada Bilim ministrligi qorqytyp-úrkitip, qorlaýǵa qarsy kúres jónindegi arnaiy keńes qurdy. Onyń qyzmeti balalar úshin qaýipsiz orta qurý úshin eresekterdiń jaýapkershiligin arttyrýǵa baǵyttalǵan», - dep atap ótti májilismen.
Sondai-aq, halyq qalaýlysy kámeletke tolmaǵandarǵa quqyqtyq tárbie berýdiń arnaiy ádisin engizýdi jáne ol týraly balalar men jasóspirimderdi keńinen habardar etýdi alǵa tartty.
Depýtat jasóspirimniń kriminogendik minez-qulqynyń qalyptasýyna moraldyq, quqyqtyq jáne basqa da áleýmettik formalardyń biryńǵai júiesiniń bolmaýy áser etedi. Odan bólek, M.Magerramovtyń málimdeýinshe, qoǵamda bolyp jatqan oqiǵalar, áskerdegi ólim, býlling, álimjettik basqa da zorlyq-zombylyq jasóspirimniń psihikasy men is-áreketine tikelei yqpaly bar.
