Elimizde 3 myń jumysshy 1 mlrd teńgeden astam jalaqysyn ala almai otyr. Bul týraly QR Premer-Ministri Asqar Maminge depýtattyq saýal joldaǵan senator Andrei Lýkin aitty, dep habarlaidy "Ult aqparat".
Senatordyń dereginshe, elimizdegi 50 kásiporynda eńbek etip júrgen jumysshylarǵa tólenbegen jalaqynyń jalpy somasy 530 million teńgeden asyp ketken.
Sondai-aq 190 qyzmetker jumys isteitin 16 kásiporynnyń qaryzy 115 mln teńgeni quraidy. Ony bolashaqta da tóleý múmkin emes kórinedi.
Al 1300-den astam adamdy jumyspen qamtyǵan, áitse de jalaqy qaryzy jarty milliard teńgege jetken taǵy 34 kásiporynnyń eńbekaqy tóleýge múmkindigi bar ekeni belgili bolyp otyr.
«Áleýmettik shielenister men eńbek qaqtyǵystarynyń qaýpin baqylaý múmkindigin qarastyrý, ár kásiporyn úshin áleýmettik turaqtylyq indeksin anyqtaý, olardy sheshýdiń naqty sharalaryn ázirleýmen ár problemaly kásiporynnyń jaǵdaiyn baǵalaý jáne jumys istep turǵan qala quraýshy ári iri kásiporyndarǵa airyqsha kóńil bólý kerek. Olardyń jaǵdaiy aimaqtardaǵy saiasi-áleýmettik ahýalǵa áser etedi», - dedi Andrei Lýkin.
Onyń aitýynsha, jumysshylardyń jumyspen qamtylýyn baqylaý, sondai-aq jalaqy boiynsha bereshektiń ósýine jol bermeý úshin eńbek kelisimsharttaryn esepke alýdyń biryńǵai júiesin qoldaný qajet.
