Búgin Qazaqstannyń júzge jýyq testileý pýnktinde Ulttyq biryńǵai testileýdiń alǵashqy kezeńi bastaldy, dep habarlaidy QR Bilim jáne ǵylym ministrligi.
2020 jyldyń 16-20 qańtary aralyǵynda 95 myńnan astam úmitker UBT tapsyrady.
Aita keteiik, joǵary oqý ornyna aqyly negizde túsý úshin UBT jylyna 4 ret ótkiziledi (qańtar, naýryz, maýsym jáne tamyz). Bul rette, oqýǵa túsýshiler bilim granty konkýrsyna qatysý úshin maýsym aiynda ótetin UBT-ny tapsyrýy qajet. Jalpy, Ulttyq biryńǵai testileýdi tapsyrý formaty ózgergen joq. Bul norma joǵary bilim alýǵa qoljetimdilikti arttyrý maqsatynda engizildi.
UBT-ǵa qatysý úshin qujattar 2019 jyly 1-15 jeltoqsan aralyǵynda biryńǵai aqparattyq júie arqyly qabyldandy. Nátijesinde, UBT-ǵa qatysýǵa 95 myńnan astam adam ótinish berdi. Onyń ishinde 75 520 oqýshy testileýdi qazaq tilinde, 22 744 bala – orys tilinde jáne 176 bala aǵylshyn tilinde tapsyrady.
Sanattar boiynsha, 90 808 bala – 11 (12) synypta oqidy jáne byltyrǵy testileýden ótpegen, JOO-ǵa shartty túrde qabyldanǵan 2 701 úmitker bar. Odan bólek, shyǵarmashylyq daiyndyqty talap etetin, ózge bilim berý baǵdarlamasyna aýysqysy keletin 1-2-inshi kýrstaǵy 1 841 stýdent bar.
UBT-da 820 aýditoriia paidalanylady. Barlyq aýditoriialar uialy bailanys quraldarynyń jumysyn buǵattaityn quraldarmen jáne beinebaqylaý kameralarymen qamtamasyz etilgen. Tyiym salynǵan zattar tabylǵan úmitker UBT-ǵa kirgizilmeidi jáne akt arqyly ǵimarattan shyǵarylady.
Óńirlerge QR Bilim jáne ǵylym ministrliginiń 447 ókili jiberiledi, apelliatsiialyq komissiialar qurylady, meditsinalyq kómek kórsetý beketteri uiymdastyrylady jáne testileý barysyndaǵy qaýipsizdik qamtamasyz etiledi. Budan bólek, qajet bolǵan jaǵdaida jeke kómekshiler, sondai-aq erekshe bilim berý qajettiligi bar balalarǵa arnalǵan sýrdoaýdarmashylar usynylady.
Jergilikti jerlerde UBT uiymdastyrý jáne ótkizý boiynsha Memlekettik komissiialar quryldy. Memlekettik komissiia quramyna oblystar nemese respýblikalyq mańyzy bar qalalar ákimdikteriniń ókilderi, quqyq qorǵaý organdarynyń, qoǵamdyq uiymdardyń, buqaralyq aqparat quraldarynyń ókilderi kirdi.
