Búgin Senat tóraǵasy Máýlen Áshimbaevtyń tóraǵalyq etýimen Senat janyndaǵy Jas sarapshylar klýbynyń otyrysy boldy. Tórtinshi márte ótip otyrǵan kezdesýdiń basty taqyryby ekologiia, tabiǵi resýrstardy utymdy paidalaný jáne turaqty damý máselelerine arnaldy, dep habarlaidy "Ult aqparat".
Senat baspasóz qyzmetiniń málimetinshe, otyrysty ashqan M. Áshimbaev elimizdiń aldynda búkil álemge tán ekologiialyq qaýip-qaterler: klimattyń ózgerýi, jerdiń shóleittenýi men tozýy, bioalýantúrliliktiń joǵalýy, topyraq eroziiasy, aýa men sýdyń lastanýy turǵanyn atap ótti. Sondai-aq ruqsat etilmegen qoqys úiindileri, ónerkásip qaldyqtaryn kádege jaratý, erekshe tabiǵi nysandardyń ekojúiesin qalpyna keltirý jáne saqtaý problemalary da mańyzdy bolyp otyr.
«Ekologiialyq problemalardy memlekettiń qatysýymen ǵana sheshý múmkin emes ekeni anyq. Azamattyq sektor, ÚEU, biznes, janashyr jandar men eriktiler tarapynan da belsendi is-qimyl qajet bolady. Halyq arasynda ekologiialyq oilaý men qorshaǵan ortaǵa jaýapkershilikpen qaraýdy damytý qajet. Sondai-aq tiimdi zańdar da kerek. Bul turǵyda ótken jyldyń sońynda elimiz Prezidentiniń bastamasy boiynsha Parlament qabyldaǵan Ekologiialyq kodekstiń mańyzy zor. Ondaǵy normalardyń arqasynda qorshaǵan ortany qorǵaý salasynda jańa erejeler jasalady. Eń aldymen, kodeks arqyly «lastaýshy tóleidi jáne túzetedi» qaǵidaty iske asady. Bul lastaýshylarǵa aiyppul tólemderiniń mólsherin birneshe ret arttyrýdy da, olar keltirgen zalaldy joiý úshin qajetti sharalar qabyldaýdy da bildiredi», - dep atap ótti M. Áshimbaev.
Óz kezeginde Ekologiia, geologiia jáne tabiǵi resýrstar ministri Maǵzum Myrzaǵaliev atmosferadaǵy aýanyń sapasy men qatty turmystyq qaldyqtardy óńdeý deńgeiiniń tómendigi ekologiialyq kún tártibindegi birinshi kezektegi másele ekenin atap ótti. Atmosferaǵa shyǵaryndy kólemi óse túsýde: 2020 jyly olar 2,57 mln tonnany qurady, bul 2019 jylmen salystyrǵanda (2,51 mln tonna) kóp. Sondai-aq sý resýrstaryn únemdeý salasynda infraqurylymnyń eskirýi, kóptegen sýdyń ysyrap bolýy, sý únemdeýge yntalandyrýdyń jetkiliksizdigi problemalary oryn alyp otyr.
«Ekologiialyq problemalardy sheshý úshin 2025 jylǵa deiin ekologiialyq jaǵdaidy jaqsartý jónindegi jol kartalary jasaldy, olar qatty turmystyq qaldyqtarǵa arnalǵan jańa 24 poligon salýdy, lastanǵan jerlerdi qalpyna keltirýdi jáne joiýdy, jańa 7 káriz-tazartý qurylystaryn salýdy jáne 12 qurylysty qaita jańartýdy, sondai-aq 2050 jylǵa deiingi tómen kómirtekti damý tujyrymdamasyn ázirleýdi kózdeidi», - dep atap ótti M. Myrzaǵaliev.
Jas sarapshylar klýbynyń otyrysy barysynda pikirtalasqa qatysýshylar ekologiialyq problemalardy sheshýge, tabiǵi resýrstardy únemdeýge jáne turaqty damýǵa qatysty óz pikirleri men usynystarymen bólisti.
Ulttyq biotehnologiialar ortalyǵyndaǵy Adam genetikasy zerthanasynyń meńgerýshisi Maqsat Jabaǵin Qazaqstannyń sirek kezdesetin jáne joiylyp bara jatqan flora men faýna túrlerin saqtaý úshin bioalýantúrliliktiń ulttyq biobankin qurýdy usyndy. «Ekonomikalyq zertteýler institýty» AQ makroekonomikalyq taldaý jáne boljamdaý ortalyǵy direktorynyń orynbasary Ernar Serik investorlardy tartý arqyly Qazaqstan aýmaǵynyń shóleittený problemasyn sheshý joldary týraly oiymen bólisti.
