QR Bas memlekettik sanitarlyq dárigeri Aijan Esmaǵambetova ótken aptadaǵy koronavirýs juqtyrǵandar ósimi týraly aitty, dep habarlaidy "Ult aqparat".
«Ótken aptadaǵy kúndelikti naýqastar ósimi 1,9 % ben 4,7% aralyǵynda boldy. Bul – simptomdy jáne simptomsyz naýqastardyń jalpy sany. Naýqastardy 3 maýsymnan bastap, simptomdy jáne simptomsyz dep bóle bastadyq. Sáikesinshe, 3-7 maýsym aralyǵynda 1357 simptomsyz, 1073 simptomdy naýqas tirkeldi. Barlyǵy 12 859 koronavirýs infektsiiasyn juqtyrý jaǵdaiy anyqtaldy», - dedi A. Esmaǵambetova onlain-brifingte.
Sonymen birge, bas sanitar virýs tasymaldaýshylardyń qandai jolmen anyqtalǵanyn túsindirdi.
«Naýqastardyń 45% - bailanysqan adamdar arasynan anyqtaldy, 40% - profilaktikalyq tekserýden ótkender, 10% - aýrý belgilerin baiqap, dárigerge habarlasqandar, 5% - shet elderden kelgender. Qazirgi ýaqytta 5 427 adam em qabyldap jatyr, al 7 484 adam, iaǵni naýqastardyń 53% - aýrýdan jazylyp, úilerine qaitaryldy», - dedi A. Esmaǵambetova.
