Búginnen bastap temeki ónimderiniń baǵasy taǵy 20 teńgege kóteriledi. QR Úkimetiniń №587 qaýlysyna sáikes, filtrli, filrsiz sigaretter men papirostarǵa shekti baǵany ornatyp qana qoimai, ony birtindep kóterý josparlanǵan, dep xabarlaidy Ult.kz tilshisi QazAqparat agenttigine silteme jasap.
Atalǵan qujat boiynsha 2018 jyly 1 shildeden bastap 31 jeltoqsanǵa deiin bir qorap temekiniń eń tómengi baǵasy 360 teńge bolýy shart. Buǵan deiin 20 dana filtrli-filtrsiz sigaretter men papirostardyń shekti baǵasy 340 teńge bolǵan. 2019 jyly 1 qańtardan bastap atalǵan meje 380 teńgege deiin kóteriledi. Aita keteiik, Qazaqstanda temeki shegetin azamattar az emes. Ótken jyly 1000 dana temekiniń aktsizderi 6,2 myń teńgege (bir qoraptan 125 teńgeniń salyǵy) deiin kóterilgen bolatyn. Biyl taǵy 7,5 myń teńgege deiin ósti. Kelesi jyly atalǵan salyq 8,7 myń teńgege jetýi tiis. Aldaǵy ýaqytta temeki aktsizderiniń qunyn kórshi Reseidiń deńgeiine deiin kóterý kózdelip otyr. Al salyqtyń mólsheri artsa, baǵa da kóteriledi.
Budan bólek, dúken sórelerinen temeki ónimderin múldem alyp tastaýy múmkin.
