"Batys Qazaqstandaǵy tarihi óńirdiń biri - Syrym aýdanynda Syrym Datulynyń 275 jyldyǵyna jáne Alashordanyń 100 jyldyǵyna orai kóptegen sharalar uiymdastyrylmaq. Bul týraly Qadyr Myrza Áli atyndaǵy mádeniet jáne óner ortalyǵynda «Qazaqstannyń ótkeni syrly, bolashaǵy nurly» degen taqyrypta oblys tarihshylary bas qosqan dóńgelek ústel otyrysynda aýdan ákimi Abat Shynybekov málim etti", - dep habarlaidy Ult.kz tilshisi QazAqparat agenttigine silteme jasap.
Onyń aitýynsha, aldaǵy jyly qol bastaǵan batyr, kósem ári sheshen Syrym Datulynyń 275 jyldyǵy keńinen atalyp ótilmekshi. Sonymen qatar Alashordanyń 100 jyldyǵyna bailanysty sharalar uiymdastyrylady. Alashordanyń Batys bólimi qazirgi Syrym aýdanynyń ortalyǵy Jympity aýylynda oryn tepkeni, ony Alash arystary, el «eki dos» dep atap ketken Jahansha jáne Halel Dosmuhamedovter basqarǵany belgili. Osyǵan orai tarihshylarmen, ziialy qaýym ókilderimen aldyn ala kezdesip, aldaǵy sharalar jóninde aqyldasyp alý qajettigi týyndap otyr.
Jiyn barysynda ólketanýshy Jaisań Aqbai, oblystyq máslihat hatshysy Málik Qulshar, tarih ǵylymdarynyń doktory, professor Murat Sydyqov, tarihshy Jańabek Jaqsyǵaliev, «Jaiyq Press» JShS bas direktory Jantas Safýllin jáne basqalar sóz alyp, óz oi-pikirlerin, usynystaryn ortaǵa saldy.
Aita keteiik, QR táýelsizdiginiń 25 jyldyǵyna orai «Beibitshilik pen kelisimniń jol kartasy» megajobasy aiasynda Syrym aýdanynyń Oral qalasyndaǵy mádeniet kúnderi osy Qadyr ortalyǵyndaǵy «Táýelsizdikke tartý» atty kórmemen ashyldy. Onda aýdan sýretshileri men qolóner sheberleriniń týyndylary qoiyldy. Kórmeniń ashylý rásiminde belgili aqyn, halyqaralyq «Alash» syilyǵynyń laýreaty Aqushtap Baqtygereeva ónerli eldiń órenderine tabys tiledi. Aýdannan kelgen ónerpazdar án shyrqap, kúi kúmbirletti.
Qala kúni aiasynda Syrym aýdanynyń ókilderi «Beibitshilik pen kelisimniń jol kartasy» megajobasynyń estafetasyn qalalyqtarǵa saltanatty jaǵdaida tabys etpekshi.
