Qazaqstanda 86 myńǵa jýyq orynǵa stýdenttik jataqhana kerek. Bul týraly QR BǴM Qarjy ortalyǵynyń ilgeriletý jáne syrtqy kommýnikatsiialar departamentiniń direktory Alpamys Satybaldin málim etti, dep habarlaidy QazAqparat tilshisi.
«Bul baǵdarlama 2018 jyly bastaý alǵan bolatyn. Osy oraida kem degende 75 myń stýdentti jataqhanamen qamtamasyz etý eskerilgen. Bul máseleni sheshý úshin Bilim jáne ǵylym ministrligine qarasty Qarjy ortalyǵy arnaiy baǵdarlama ázirledi. Osyǵan sáikes kez kelgen jeke kásipker nemese zańdy tulǵa jataqhana salatyn bolsa, árbir salynǵan orynǵa memleket tapsyrys aiasynda qarajat bólinedi», – dedi A. Satybaldin Qazaqstan telearnasyndaǵy «Tańsholpan» baǵdarlamasynda.
Bul turǵyda ol jataqhana qurylysynda kásipkerdiń shyǵyndary óteletinin jetkizdi.
«Jataqhana» túsinigi bul jobany ary qarai ilgeriletýde kedergi keltirip otyr. Óitkeni jataqhana degende oi-sanamyzǵa keńestik kezeńde salynǵan beton qabyrǵaly tar bólmeler, qos qabattan quralǵan kereýetter elesteidi. Sonymen qatar, bul bólme tórt orynǵa eseptelse, ol jerde kóbine 6-8 stýdent ornalasady. Degenmen qazirdiń ózinde kóptegen joǵary oqý ornynda jataqhanada oryn jetispegendikten, stýdentter osyndai jaǵdaida turyp jatyr. Nur-Sultan men Almaty qalalarynda páter jaldap turý qymbatqa túsetini belgili», - dedi departament basshysy.
Onyń aitýynsha, jańa jataqhana ǵimaratyn salýdan bólek, qonaq úilerdiń nysandaryn da qaita laiyqtap, jataqhana retinde paidalanýǵa berýge bolady.
«2021 jyldyń sońyna qarai 120-dan astam jataqhana salyndy, iaǵni olar 30 364 orynǵa eseptelgen. Biz bul baǵdarlamany bastaǵanda, 2018 jyly elimizde 82 myń stýdentke jataqhana qajet bolǵan. Odan beri 30 myń oryn paidalanýǵa berilgenin eskersek, taǵy 50 myń oryn salý kerek edi. Alaida qazirdiń ózinde 85 myńnan astam stýdentke jataqhana kerek bolyp tur. Sebebi 2000-shy jyldary elimizde bala týý kórsetkishi ósti. Olar qazirgi kezde osy balalar ýniversitetterge túsip jatyr. Sáikesinshe, oqý oryndaryna túsetin balalardyń sany artyp keledi», - dedi A. Satybaldin.
Onyń sózine qaraǵanda, jataqhana oryndarynyń basym bóligin Almaty qalasynda salý kerek.
«Shyn máninde, naqty qajettilik 86 myń orynǵa jetip qaldy. Atap aitqanda, bul joba aiasynda kedergilerdi barynsha azaitýǵa tyrystyq», - dedi ol.
Osy oraida Qarjy ortalyǵynyń ókili jataqhana salatyn kásipkerler qandai qadamdardy jasaýy kerek ekenin aitty. Birinshiden, kásipker 500 oryndyq jataqhana salatyny týraly ótinim jazyp, eki qujatty usynady. Osy oraida salynatyn jerdiń satyp alý sharty men jerdiń aktisi qamtylady. Ekinshiden, kásipkermen arada aldyn ala shart jasalady. Bul óz kezeginde kásipkerge kepildik retinde bolady, sondai-aq ortalyqqa qarajatty josparlaýǵa múmkindik beredi. Úshinshiden, kásipker óz qarajatyna jataqhanany salyp, paidalanýǵa tapsyrady. Tórtinshiden, Qarjy ortalyǵy tarapynan salynǵan jataqhanalar óziniń nysanaly maqsatyn ózgertpei, keminde 20 jyl jumys isteýi tiis degen talap qoiylady. Besinshiden, kásipkermen arada satyp alý portalynda kelisimshart bekitiledi jáne árbir orynǵa ai saiyn tólem jasalady.
«Bul baǵdarlamany ázirlegende kóptegen kásipkerge úndeý jasadyq. Iaǵni qonaq úi salýdyń ornyna jataqhana nysandaryna mán berýdi suradyq. Sebebi qazirgi kezde qonaq úi naryǵy barynsha orny toltyrylǵan bolyp tur, básekelestik óte joǵary. Sondyqtan jataqhana qurylysyna qatysty tyń qadamdar qarastyrylyp, sybailas jemqorlyqqa tosqaýyl qoiatyn is-sharalardy eskerdik. Bul turǵyda joǵaryda atalǵan mindetter men sharttar oryndalsa boldy, iaǵni tender jáne basqa talaptar eskerilmegen. Sonymen qatar, salynǵan jataqhanadaǵy árbir orynǵa jasalatyn tólemniń mólsheri ońai esepteledi», - dedi Alpamys Satybaldin.
