Qorǵanys ministrligi kópshiliktiń talqysyna rezervtegi áskeri qyzmet týraly zań jobasynyń tujyrymdamasyn shyǵardy, dep habarlaidy "Ult aqparat".
Qujattyń tolyq ataýy – «Qazaqstan Respýblikasynyń keibir zańnamalyq aktilerine rezervtegi qyzmet máseleleri boiynsha ózgerister men tolyqtyrýlar engizý týraly» Qazaqstan Respýblikasy Zańy jobasy.
Ministrliktiń baspasóz qyzmeti atalmysh ózgeris halyqaralyq tájiribege súiene otyryp daiyndalǵanyn habarlady.
«Qorǵanys ministrligi qazirgi zamanǵy syn-qaterlerge turaqty negizde taldaý júrgizedi. Olarǵa qarýly janjaldar, sonymen qatar avariiamen, pandemiiamen, ekologiialyq apatpen bailanysty tótenshe jaǵdailar jatady. Mundai jaǵdailarda qarýly kúshter men jumyldyrý rezervi qoldanystaǵy zańnamaǵa sáikes tartylýy múmkin. Bul rette halyqaralyq tájiribe jumyldyrý rezervin óristetý men tartýdyń qysqa merzimde talap etilýi múmkin ekenin kórsetedi», - dep túsindirdi ministrlik ókilderi.
Osyny eskergen Qorǵanys ministrligi rezervtegi áskeri qyzmetti engizý josparlap otyr. Rezervtegi qyzmet azamattardyń negizgi jumysyn qosa atqarýymen, jalaqysyn saqtai otyryp, áskerdegi qyzmeti úshin qosymsha tólem berile otyryp, kelisimshart negizinde atqarylady.
«Tiisti qajetti mamandyqtary bar azamattar áskeri bólimmen rezervte qyzmet ótkerý týraly 3 jylǵa tiisti kelisimshart jasaidy. Rezervtegi adamdardy daiarlaý jylyna 60 kúnnen aspaityn merzimde júrgiziletin bolady. Ol oqytý baǵdarlamasyna sáikes uzaqtyǵy 1 aiǵa deiin ai saiynǵy eki kúndik sabaqtar men jiyndardan (oqý-jattyǵýlardan) turady. Bul rette tapshy mamandyqtar boiynsha daiarlyqqa erekshe nazar aýdarylatyn bolady», - delingen ministrliktiń resmi málimetinde.
Rezevtegi áskeri qyzmet ótkerýshilerge áskeri bólimderde saqtaýda turǵan qarý men jaýyngerlik tehnika bekitilip beriledi. Áskeri bólimder olardy sabaqtar men oqý-jattyǵýlar kezinde tiisti kiim-keshekpen, kazarmadan turatyn orynmen jáne tamaqpen qamtamasyz etýge tiis.
Al rezervtegi áskeri qyzmeti úshin ai saiyn eń tómengi 1 jalaqy mólsherinde, jiyndar (oqý-jattyǵýlar) ótkizý kezeńinde rezervtegi adamnyń ortasha jalaqysy mólsherinde ailyq tólenedi.
«Sabaqtar men oqý-jattyǵýlarda bolý merzimi áskeri qyzmettegi eńbek sińirgen jyldarynyń jalpy merzimine kiredi. Rezervtegi qyzmet qysqa merzimde tiisti áskeri bólimge kelýge jáne qoiylǵan mindetterdi oryndaýǵa dereý kirisýge ázir, daiarlanǵan azamattardyń bolýyna múmkindik beredi», - deidi ministrlik mamandary.
