Qazaqstanda PTR testileýdiń baǵasy tómendeýi múmkin, dep habarlaidy "Ult aqparat" Premer-Ministrdiń resmi saityna silteme jasap.
Búgin QR Premer-Ministriniń orynbasary Eraly Toǵjanovtyń tóraǵalyǵymen ótken Vedomstvoaralyq komissiianyń otyrysynda Memleket basshysy Q. Toqaevtyń koronavirýs pandemiiasynyń ekinshi tolqynyna daiyndyq máseleleri jónindegi 7 qazandaǵy keńeste bergen tapsyrmalaryn oryndaý boiynsha naqty sharalar ázirlendi.
Jiynda Eraly Toǵjanov jaýapty memlekettik organdarǵa biznes-qoǵamdastyqpen, salalyq qaýymdastyqtarmen birlesip, halyqqa qyzmettiń qoljetimdiligin arttyrý úshin úsh kúndik merzimde PTR testileý baǵasyn tómendetý máselesin pysyqtap, Vedomstvoaralyq komissiianyń kelesi otyrysyna kelisilgen usynystardy shyǵarýdy tapsyrdy.
Sonymen qatar, Premer-Ministrdiń orynbasary bir apta merzimde óńirlerde PTR testileýdi birkelki ótkizýdi qamtamasyz etýdi, karantindik rejimdi buzýshylyqtardy, onyń ishinde QR memlekettik shekarasy arqyly ótkizý pýnktterinde, áýejailarda, temirjol vokzaldarynda anyqtaý boiynsha monitoring toptarynyń jumysynyń tiimdiligin arttyrýdy tapsyrdy.
Eske sala keteiik, keshe Memleket basshysy Qasym-Jomart Toqaev koronavirýsqa qatysty testileý kólemin arttyryp, baǵasyn qoljetimdi etýdi tapsyrǵan edi.
Memleket basshysynyń aitýynsha, zerthana jelisi keńeitilip, barsha álemde testileý quny tómendegenine qaramastan, elimizde testileý baǵasy áli de joǵary bolyp tur. Bul turǵyda baǵa 10-nan 18 myń teńgege deiin jetedi.
«Halyqtyń basym bóligine bul soma tiimsiz bolyp tur dep sanaimyn. Úkimet pen ákimderden testileýdiń qarjylyq máselesin sheshý talap etiledi», - dedi Qasym-Jomart Toqaev.
