Qazaqstanda kórsetiletin memlekettik qyzmettiń 93,4 paiyzy elektrondy formatqa aýystyryldy. Bul týraly QR memlekettik qyzmet isteri agenttiginiń keńeitilgen alqa otyrysynda aityldy, dep habarlaidy QazAqparat.
«Aldaǵy ýaqytta memlekettik qyzmetter sapasyn baǵalaýdy onlain formatqa kezeń-kezeńmen kóshirý josparlanýda. Elektrondyq qyzmetterdi damytýǵa keler bolsaq, búginde memlekettik qyzmet kórsetý salasyn tsifrlandyrýǵa erekshe kóńil bólinýde. Tizilimge sáikes, memlekettik qyzmetterdiń 93,4% elektrondyq formatqa aýdaryldy», - dedi QR Memlekettik qyzmet isteri agenttiginiń tóraǵasy Darhan Jazyqbaev atalǵan jiynda.
Onyń aitýynsha, atalǵan baǵyttaǵy oń ózgeristerge qaramastan, jekelegen memlekettik qyzmetter boiynsha problema bar.
«Agenttik turaqty negizde, «elektrondyq úkimet» portalynda memlekettik qyzmetterdiń kórsetilýine monitoring júrgizip, qorytyndysy boiynsha portalda elektrondyq qyzmetterdiń 189 túrine qoljetimdiliktiń joqtyǵyn anyqtady. Sonymen qatar, agenttiktiń jedel monitoringiniń arqasynda, «elektrondyq úkimet» portalynda 158 elektrondyq qyzmettiń qoljetimdiligi qamtamasyz etildi», - deidi ol.
Sonymen qatar agenttik basshysy memlekettik qyzmet salasy boiynsha álemdik úzdik tájiribelerdiń zertteletindigin tilge tiek etti.
«Memlekettik qyzmetshilerdiń ózine júktelgen tapsyrmany utymdy oryndaýy úshin, ikemdi jumys kestesi men qashyqtyqtan jumys isteý jaǵdaiyn jasaý qajet. Iaǵni jumys jasaý keńistigindegi tiimdi jaǵdailardy paidalaný tájiribesin keńeitýimiz kerek. Sol sekildi aldaǵy ýaqytta agenttik sarapshylarmen ortaq talqylaýdyń qorytyndysyn jáne álemdik tájiribeni jan-jaqty zerdelep, naqty usynystardy daiyndaidy», - dedi Jazyqbaev.
