2020 jyldyń III toqsanynda elimizde 126 myńnan astam qylmystyq quqyq buzýshylyq tirkeldi. Bul týraly QR UEM Statistika komitetinen málim etti, dep habarlaidy "Ult aqparat".
QR Bas prokýratýrasy Quqyqtyq statistika jáne arnaiy esep komitetiniń derekteri boiynsha 2020 jylǵy III toqsanda 126 499 qylmystyq quqyq buzýshylyq tirkeldi. Bul ótken jylǵy sáikes kezeńmen salystyrǵanda 34,4 paiyzǵa kem.
Respýblikadaǵy qylmys deńgeii 10 myń turǵynǵa shaqqanda 90 tirkelgen qylmysty qurady. Oblystar men respýblikalyq mańyzy bar qalalar bólinisinde 10 myń turǵynǵa shaqqandaǵy eń joǵary qylmys deńgeii Almaty, Shymkent, Nur-Sultan qalalarynda, Qostanai, Aqmola, Shyǵys Qazaqstan jáne Batys Qazaqstan oblystarynda, eń tómeni Túrkistan oblysynda baiqalady.
Aýyr jáne asa aýyr qylmystar sany ótken jylǵy sáikes kezeńmen salystyrǵanda 65,2 paiyzǵa artty. Qylmystar qurylymynda olardyń úles salmaǵy 31,5 paiyz (2019 jylǵy III toqsanda – 12,1%) tiisinshe, aýyrlyǵy ortasha jáne tómen qylmystar 50,9 (72,7%) jáne 17,6 paiyzdy (15,2%) qurady.
«2020 jylǵy III toqsan nátijeleri boiynsha tirkelgen qylmystardyń ishindegi eń úlken úlesti menshikke qarsy qylmystar alady - 73,6 paiyz (2019 jylǵy III toqsanda – 79,2%). Olardyń kópshiligi basqa bireýdiń múlkin urlaý – 52,8 myń oqiǵa (109 myń oqiǵa.). Qylmystyń osy tobynda ótken jylǵy sáikes kezeńmen salystyrǵanda kórineý qylmystyq jolmen tabylǵan múlikti iemdený nemese ótkizýge bailanysty jaǵdailar 74,2 paiyzǵa artqanyn atap ótý kerek», - dedi komitetten.
Vedomstvo málimetinshe, jeke adamǵa qarsy jasalǵan qylmystar sany 7 052 oqiǵany qurady. Bul ótken jylǵy sáikes kezeńmen salystyrǵanda 11,7 paiyzǵa az. Zorlaý – 39,6, qorqytý – 26,4, adam urlaý – 24 paiyz tómendegen.
Sonymen qatar, qasaqana kisi óltirý jáne adam óltirýge oqtalý sany ótken jylǵy sáikes kezeńmen salystyrǵanda 15,4 paiyzǵa artty. Respýblikada adam óltirý deńgeii 100 myń turǵynǵa shaqqanda 4,8 qurady. Oblystar men respýblikalyq mańyzy bar qalalar bólinisinde 100 myń adamǵa shaqqandaǵy adam óltirýdiń eń joǵary deńgeii Pavlodar, Aqmola, Qaraǵandy, Jambyl oblystarynda, eń tómeni Shymkent qalasynda baiqalady.
