Elimizde qurylys nysandaryn salý barysynda otandyq ónimderdi qoldaný mindeti engizildi, dep habarlaidy QazAqparat.
«Memleket basshysynyń tapsyrmasyna sáikes, qurylys salasynda otandyq ónimniń úlesin arttyrý maqsatynda, bizdiń ministrlik normativtik-retteý sharasyn qabyldady. Sonyń aiasynda elektrondy reestr quryldy, onda qurylysty salý barysynda qoldanyp jatqan materialdardyń tizimi kórinip turady. Endigi ýaqytta biýdjet qarajatyna salynyp jatqan qurylys nysanynda qazaqstandyq qurylys materialyn qoldaný mindetti talaby zań júzinde engizildi», - dedi QR Indýstriia jáne infraqurylymdyq damý birinshi vitse-ministri Qaiyrbek Óskenbaev OKQ-de ótken baspasóz máslihatynda.
Vitse-ministrdiń aitýynsha, atalǵan shara otandyq qurylys materialdarynyń óndirisine oń áserin tigizedi.
«Mysaly, qurylysty jobasyn josparlaý barysynda mindetti túrde qazaqstandyq qurylys materialdaryn qoldaný kórsetiletin bolady. Sonymen qatar, qurylystyń smetalyq qujatynda, ár qurylys materialdyń qai elde óndirilgeni kórsetilip turady. Taǵy bir talap ózimizde óndirilgen qurylys materialynda «Qazaqstanda jasalǵan» jazýynyń bolýy shart. Jáne bul protsess qatań baqylaýda bolady. Osy talapty oryndaý maqsatynda biyl sáýir aiynda zańdaǵy tapsyrys berýshi fýnktsiiasyna ózgeris engizildi. Iaǵni istelingen jumys aktisinde otandyq qurylys materialdarynyń kólemi kórsetiledi. Sol siiaqty endigi ýaqytta tapsyrys berýshiler merdiger kompaniialardyń esebine qarap otyryp, qanshalyqty otandyq ónimdi qoldanyp jatqanyn bile alady», - deidi ol.
Odan bólek, ministrdiń birinshi orynbasary qurylys salasyndaǵy atalǵan jańashyldyqtyń memlekettik satyp alý portalynda ashyq túrde jariia etiletinin málim etti.
