QR Aýyl sharýashylyǵy vitse-ministri Jeńis Óserbai eldegi kúnbaǵys maiy men kókónis qory týraly aityp berdi, dep habarlaidy QazAqparat.
«Naryqty kúnbaǵys maiymen qamtamasyz etý týraly aitsaq, 1 naýryzdaǵy jaǵdai boiynsha respýblikada qaita óńdeýge jiberiletin 649 myń tonna kúnbaǵys bar. Kúnbaǵys maiynyń qory óńirlerde 30,6 myń tonnany quraidy. Osylaisha, ishki naryq tolyǵymen kúnbaǵys maiymen jáne ony óndirýge arnalǵan shikizatpen qamtamasyz etilgen», - dedi Óserbai ortalyq kommýnikatsiialar qyzmetinde ótken baspasóz máslihatynda.
Spikerdiń aitýynsha, kókónis daqyldary men kartop qory naryqqa erte pisetin kókónister túspeitin kezeńde de halyqtyń qajettiligin qamtamasyz etýge jetkilikti.
Sonymen qatar, qazirgi ýaqytta maidyń, kúnbaǵys tuqymdarynyń jáne kartoptyń eksportyna shekteý engizilgen.
Buǵan deiin Jeńis Óserbai eldegi áleýmettik mańyzy bar azyq-túlik qory týraly aityp bergen edi.
Ákimdikterdiń jedel derekterine sáikes, 12 naýryzdaǵy jaǵdai boiynsha respýblikada barlyǵy 1,3 mln tonna áleýmettik mańyzy bar azyq-túlik bar.
Onyń ishinde un – 144 myń tonna, qant – 90 myń tonna, kúrish – 39,3 myń tonna, makaron – 21 myń tonna jáne shamamen 900 myń tonna kókónis ónimderi jáne basqalary bar.
Sonymen birge, Qazaqstanda shamamen 90 myń tonna qant qory bar jáne respýblika qantpen tolyq qamtamasyz etilgen.
Ulttyq statistika biýrosynyń resmi derekterine sáikes, 1 naýryzdaǵy jaǵdai boiynsha respýblikada 9,1 mln tonna dándi jáne dándi-burshaqty daqyl qory bar.
