Elimizde kommýnaldyq tólemderge beriletin turǵyn úi kómegin taǵaiyndaý protsesi avtomattandyrylyp, óńirlerde eseptegish quraldardy jappai ornatý josparlanyp otyr. Bul týraly Úkimet otyrysynda Premer-ministrdiń orynbasary Qanat Bozymbaev aitty, dep habarlaidy ult.kz.
Jiynda vitse-premer óńir ákimdikterine biyl «Energetikalyq jáne kommýnaldyq sektorlardy jańǵyrtý» ulttyq jobasy aiasyndaǵy jobalardyń júzege asyrylýyn erekshe baqylaýǵa alyp, injenerlik infraqurylym nysandaryndaǵy jóndeý jumystaryn ýaqtyly aiaqtaý qajettigin basa aitty.
«Tutynýshylardy esepteý quraldarymen tolyq jabdyqtamai tsifrlandyrýdy júzege asyrý múmkin emes. Osyǵan bailanysty energetika, ónerkásip jáne qurylys ministrlikteri ákimdiktermen birlesip, qysqa merzimde árbir óńir boiynsha esepke alý quraldaryn ornatý qajettigin aiqyndap, Ulttyq ekonomika ministrligimen birge atalǵan jobalardy júzege asyrý boiynsha 2029 jylǵa deiingi naqty is-sharalar josparyn bekitýi qajet. Sonymen qatar kommýnaldyq tólemder óteý boiynsha turǵyn úi kómegin taǵaiyndaý rásimderin jeńildetý jáne avtomattandyrý jumystary júrgizilýde. Osy maqsatta Ónerkásip jáne qurylys ministrligi Eńbek jáne halyqty áleýmettik qorǵaý ministrligimen, sondai-aq ákimdiktermen birlesip, qysqa merzimde biryńǵai esep aiyrysý ortalyqtarynyń memlekettik aqparattyq júielermen tiisti integratsiiasyn qamtamasyz etýi qajet», - dedi Qanat Bozymbaev.
