Qazaqstanda bir jyl ishinde qazaqtardyń úlesi 0,6 paiyzǵa (80 myń adam) ósip, 2022 jyldyń basynda 69,59 paiyzǵa jetken. Ulttyq biýro statistikasynyń jyl saiynǵy biýlletenine súiengen "Vlast" saity osylai jazdy, dep habarlaidy Azattyq radiosy.
Elde qazaqtardyń jalpy sany 13,3 mln adam bolǵan.
Aqparatqa qaraǵanda, Táýelsizdik jyldary respýblikada qazaqtardyń sany jýyqtap alǵanda eki esege ósip (Sovet odaǵynda 1989 jyly júrgizilgen halyq sanaǵy boiynsha 39,7%), 69,59 paiyzǵa jetken.
Qazir bes aimaqta qazaqtardyń úlesi 80 paiyzdan kóp: Nur-Sultan (81,08%), Aqtóbe oblysy (84,29%), Mańǵystaý oblysy (91,57%), Atyraý oblysy (93,01%) jáne Qyzylorda oblysy (96,54%). Soltústik Qazaqstannan basqa aimaqtardyń barlyǵynda-derlik qazaqtardyń úlesi basym. Soltústik Qazaqstanda orystardyń úlesi (49 paiyzy – orystar, 35 paiyzy – qazaqtar) kóbirek.
Ulttyq biýro statistikasynyń málimeti boiynsha, byltyr taǵy birneshe etnostyń úlesi artqan. Atap aitqanda, bir jylda ózbekter 17,6 myńǵa kóbeiip, 637,9 myńǵa jetken. Etnos quramy jaǵynan ózbekter úshinshi orynda tur. Olar kóbine Túrkistan oblysy men Shymkentke shoǵyrlanǵan.
Uiǵyrlar bir jylda 4,2 myńǵa kóbeiip, 283,1 myńǵa jetken. Ázerbaijan (116,7 myń), túrik (116,2 myń), dúngen ( 78,2 myń), tájikterdiń (53,4 myń) de úlesi artqan.
Qazaqstanda orystar sany bir jylda 48,5 myńǵa azaiǵan, qazir elde 3 mln 430 myń orys turady. Qazir olardyń úlesi jalpy halyqtyń 17,94 paiyzyna teń.
Qazaqstanda sońǵy jylda ýkraindardyń úlesi azaiǵan. Qazir elde 247 myń ýkrain bar.
Byltyr 1 qyrkúiek pen 30 qazan aralyǵynda júrgizilgen Ulttyq halyq sanaǵynyń alǵashqy nátijesi boiynsha, Qazaqstan halqy 19 169 550 adamǵa jetken. Ol kezde qazaqtardyń úlesi 70,18 paiyzǵa jetkeni aitylǵan edi.
2009 jylǵy halyq sanaǵynda qazaqtardyń úlesi 63,1 paiyz bolǵan.
