Almatyda qańtar oqiǵasyn zertteitin qoǵamdyq komissiia quryldy, ony belgili quqyq qorǵaýshy, zańger Aiman Omarova basqarady, dep habarlaidy QazAqparat.
Aiman Omarovanyń aitýynsha, komissiia quramyna belgili quqyq qorǵaýshylar, qylmystyq is júrgizý quqyǵy boiynsha mamandanǵan zańgerler kirdi.
«Biz táýelsiz qoǵamdyq komissiiamyz. Eki myńnan astam qylmystyq is bar. Komissiia tek jábirlenýshilerdi, politsiiany, soqqyǵa jyǵylǵandardy ǵana tekserip, zerttemeidi. Qazaqstanda nege osyndai qandy oqiǵa boldy? Osyǵan basa nazar aýdaramyz. Túgel zertteimiz. Komissiia quramynda qorǵaýshylar bolady, olardyń barlyǵy tájiribeli, qylmystyq isti qaraityn qorǵaýshylar. Komissiia músheleriniń tizimi bar. Biraq, olardyń kim ekenin qaýipsizdik úshin jariialamaimyz», - deidi ol.
Sonymen qatar, Aiman Omarova jappai tártipsizdikti óz kózimen kórgenin aitty.
«Besinshi qańtar kúni sol jerde men boldym. Túsirgen video da bar. Ol jerde eshqandai da beibit sherý bolǵan joq. Men olardy kórdim. Túri qazaq siiaqty, biraq qazaqsha da, oryssha da sóilemeidi. Keibir jigitterdiń tiliniń dialektisi bar. Eger meniń qolyma qupiia aqparat tússe, ony tergeý barysynda aita almaimyn. Baspasóz máslihatyn ótkizip turamyz. Ózim áleýmettik jeli arqyly tikelei efirge shyǵyp otyramyn», - dedi Aiman Omarova.
