Qaǵazbastylyqtan qutqaratyn «Anyqtamasyz qyzmet» servisi iske qosyldy. Bul týraly «Azamattarǵa arnalǵan úkimet» memlekettik korporatsiiasy» KEAQ baspasóz qyzmeti habarlaidy.
Endi azamattar memlekettik organdarǵa mekenjai anyqtamasyn, sondai-aq jyljymaityn múlikke tirkelgen quqyqtar jáne jyljymaityn múliktiń bar-joǵy týraly anyqtamalardy aparýǵa mindetti emes.
Habarlamada keltirilgen derekke súiensek, QR Premer-Ministriniń orynbasary Asqar Jumaǵalievtiń tapsyrmasymen elektrondyq úkimet portalynda «Anyqtamasyz qyzmet» - «Paper free» servisi iske qosylǵan. Jańa pilottyq jobaǵa sáikes SMS-habarlama arqyly qyzmet alýshynyń ruqsaty rastalǵan jaǵdaida úshinshi tulǵalarǵa aqparattyq anyqtamalar usynýǵa múmkindik beredi.
«Biyl 25 qańtardan 5 aqpanǵa deiin halyqqa qyzmet kórsetý ortalyqtary arqyly 312 myń elektrondyq anyqtama berildi. Bul oraida biz saýalnama júrgizip, anyqtamalardyń 45 paiyzyn azamattar kommýnaldyq qyzmetter men bilim berý mekemelerine tapsyrý maqsatynda alǵanyn anyqtadyq», - deidi «Azamattarǵa arnalǵan úkimet» memlekettik korporatsiiasynyń tóraǵasy Abylaihan Ospanov.
Mysaly, jyl saiyn jańa oqý jyly qarsańynda mektepter oqýshylardan mekenjai anyqtamasyn suratady, nátijesinde milliondaǵan ata-ana HQKO-ǵa aǵylady. Eger «Paper free» servisi engizilse, oqý oryndary elektrondyq úkimet portalynan qajetti qujatty surata alady, al qyzmet alýshy, iaǵni ata-ana SMS-habarlama arqyly elektrondyq anyqtama alýǵa bir rettik ruqsat bergenin rastap, front-ofiske barý mindetinen qutylady.
«Bul servisti qoldaný úshin mobildi azamattar bazasyna tirkelý qajet. «Anyqtamasyz qyzmet» mehanizmine sáikes, múddeli tulǵa elektrondyq úkimet portalynda avtorizatsiiadan ótýi tiis. Sosyn «Úshinshi tulǵalardyń anyqtama alýy servisi» bólimin tańdap, qai azamat týraly málimet alǵysy keledi, sonyń jeke sáikestendirý nómirin jazýy tiis. Eger azamat mobildi azamattar bazasynda tirkelgen bolsa, múddeli tulǵa anyqtama túrin tańdap, óziniń elektrondyq-tsifrlyq qoltańbasymen qol qoiady. Sol sátte portal avtomatty túrde azamatqa SMS-habarlama joldap, úshinshi tulǵaǵa málimet berý/bermeý jóninde sheshim qabyldaýdy suraidy. Azamat eki saǵattyń ishinde jaýap berýi tiis», delingen habarlamada.
«Tsifrlyq Qazaqstan» baǵdarlamasy aiasynda iske qosylǵan «Paper free» nátijesinde qaǵaz júzindegi anyqtamalar sany 24 millionǵa deiin kemip, halyqqa qyzmet kórsetý ortalyqtaryna kelýshilerdiń qatary da azaiady.
