Almatyda Qazaqstan musylmandary dini basqarmasy janyndaǵy Islam ǵylymi-zertteý institýty ashyldy, dep habarlady QMDB baspasóz qyzmeti. Bul institýt memleket basshysy Qasym-Jomart Toqaevtyń Islamdy dáripteýdiń ǵylymi-teoriialyq negizin damytý jónindegi tapsyrmasy aiasynda qurylǵan.
Jańa institýttyń direktory qyzmetin belgili ǵalym, filologiia ǵylymdarynyń kandidaty, dotsent Tóráli Qydyr atqarady.
Bas múfti Naýryzbai qajy Taǵanulynyń aitýynsha, institýt ujymy Islam atyn jamylǵan túrli jamaǵattar men aǵymdardyń dini ustanymdary men jasyryn ideialaryn ǵylymi turǵydan áshkereleýge, sol arqyly elimizdiń tutastyǵy men halqymyzdyń birligine syzat túsiretin qaýip-qaterlerdiń aldyn alýǵa nazar aýdarady.
"Islam ǵylymi-zertteý institýtynyń negizgi maqsat-mindeti – ǵasyrlar qoinaýynan jetken rýhani-dini kóne qoljazbalar men eski kitaptardy kadikologiia-mátintanýlyq turǵydan zerdelep, saraptaýǵa, ony ǵylymi ainalymǵa engizýge, búgingi qoǵam suranysyna orai qaita jaryqqa shyǵarýǵa úles qosý. Asyl dinimizdiń jalpy adamzattyq qundylyqtarǵa negizdelgen imani-senim ekendigin ǵylymi turǵydan negizdeý, Islam órkenietiniń damýyna úles qosqan ǵalym-ǵulamalarymyzdyń eńbekterin zerdelep, olardyń asyl murasyn halqymyzdyń rýhani tutastyǵy men yntymaq-birligin nyǵaitý jolynda keńinen paidalaný", – delingen QMDB baspasóz qyzmetiniń habarlamasynda.
