Qańtar aiymen salystyrǵanda elimizde koronavirýspen aýyrǵandar sany 30% azaidy. Bul týraly QR Densaýlyq saqtaý ministri Aleksei Tsoi «Habar» telearnasynda aitty, dep habarlaidy "Ult aqparat".
«Búgingi tańda elimizde koronavirýs boiynsha epidemiologiialyq jaǵdai turaqty. Qańtar aiymen salystyrǵanda koronavirýspen aýyrǵandar sany 30% azaidy, sondyqtan orynsyz dúrligýdiń qajeti joq», - deidi QR Densaýlyq saqtaý ministri.
Onyń aitýynsha, josparly vaktsina egý bastaldy jáne eń aldymen vaktsina juqpaly aýrýlarǵa arnalǵan statsionarlarda jumys isteitin meditsina qyzmetkerlerine egiledi.
«Vaktsina egiletindikten dárigerlerdiń qaýipsizdigine qatysty qosymsha kepildik bar dep aitýǵa bolady. Byltyr koronavirýs infektsiiasy álem boiynsha jyldam tarap ketti, biraq biz shuǵyl sharalar qoldandyq. Tipti ár óńirde halyqaralyq talapqa sai juqpaly aýrýlar aýrýhanasyn salyp, ókpeni jasandy jeldetý apparatymen jáne basqa da meditsinalyq qurylǵylarmen qamtamasyz ettik. Aýdandardaǵy aýrýhanalar 100% jedel járdem kóligimen, rentgen apparatymen qamtamasyz etildi. Ár aimaqtaǵy qoimalarǵa dári-dármekter artyǵymen jetkizildi. Koronavirýspen aýyrǵandar tegin emdeledi. Bul - óte mańyzdy. Juqpaly aýrýlarǵa arnalǵan statsionarda tósek-orynnyń 18%-y, al jansaqtaý bólimderinde 12 paiyzy bos emes. Elimiz boiynsha aýrýhanalarda qazir 22 myń tósek-oryn bar. 50 myń tósek-orynmen qamtamasyz etýge deiin múmkindigimiz bar», - deidi ol.
