Sýret: Stock.com
Qyzmette júrip jynystyq azǵyndyqqa ushyraǵan qyzmetkerler endi eńbek kodeksimen qorǵalýy múmkin. Qyz-kelinshektershe qyryndap, qol júgirtkenderdi jazalaityn bap keńeitile túspek. Eńbek kodeksinde jazylatyn harassment uǵymy tek eńbek ujymdaryn ǵana emes, ýniversitetter men qoǵamdyq oryndardaǵy da erkinen tys tiisýdi de qadaǵalamaq. Bul týraly "Ult aqparat" 31-arnanyń Informbiýro jańalyqtar baǵdarlamasyna silteme jasap habarlaidy.
Jumysta júrip harassmentke ushyraǵan kóptegen adam bul týraly ashyq aita bermegen. Basshysy qyryndap, qol júgirtken jaǵdailardy qyz-kelinshekter qaýymy jasyryp qalady.
Harassment – ózgeniń denesine qol júgirtý, jynystyq qatynasqa májbúrleý, basshylyqtyń qysymy men telefon arqyly maza bermeýi. Mundai jaǵdaiǵa tap bolǵandar ózderiniń jábirlengenin dáleldei almai kelgen. Májilis depýtaty Juldyz Súleimenova Eńbek kodeksindegi baptyń keńeitilýi úshin birqatar jumystar atqarylyp jatqanyn aitady.
"Endi Eńbek kodeksinde harassment degen uǵym bolady. Ol ákimshilik quqyqbuzýshylyqtyń aiasynda qazir qoǵamdyq jerlerde "Tiisý" degen bap bar, sony keńeitip qaraimyz", – dedi májilis depýtaty Juldyz Súleimenova.
Bul bastamany qoǵam arasynda qoldaýshylar kóp. Olar eńbek jolynda áielderdiń quqyǵy qorǵalý tiis dep esepteidi. Al mamandar qoǵamda jii kezdesetin oqiǵalarǵa tosqaýyl qoiý úshin zańmen tyiym salý qajet dep sanaidy. Óitkeni basshynyń basynýy, jynystyq qatynasqa májbúrleý is júzinde óte sirek qaralady deidi.
"Álemdik tájiribede qarasaq, er adamnyń oǵash kózqarasynyń ózi harassment bolyp sanalady. Tipti sol úshin sottasyp jatqandar da bar. Al bizde, ókinishke qarai, mundai jaǵdailarǵa jaýapkershilik joq. Sondyqtan qazir zań jobalaryn rettep qadaǵalaý qajet. Jaqyn ýaqytta bolmasa da, bolashaqta onyń oń nátijesi mindetti túrde bolady", – dedi zańger Jangeldi Súleimenov.
