Elimizde Eńbek ulttyq jobasy ázirlenip jatyr. Bul týraly QR Eńbek jáne halyqty áleýmettik qorǵaý vitse-ministri Erjan Birjanov aitty, dep habarlaidy QazAqparat.
«Ministrlik Qazaqstan Respýblikasy Ulttyq damý josparynyń birinshi jalpyulttyq basymdyǵy - ádil áleýmettik saiasatynyń negizgi ulttyq indikatorlaryna, sondai-aq Eńbek naryǵyn damytý tujyrymdamasynyń mindetterine qol jetkizý úshin qazirgi tańda Eńbek ulttyq jobasyn ázirlep jatyr. Basty mindetterdiń biri – eńbek resýrstarynyń daǵdylaryn damytý, oqytý. Eńbek resýrstarynyń daǵdylaryn damytý, oqytý 4 jobany qamtidy. Atap aitqanda, jumys berýshilerdiń qalaýy boiynsha suranysqa ie mamandyqtarǵa oqytý; tálimgerlikpen birge jáne jalaqyny sýbsidiialaý arqyly jumys ornyna oqytý; elektrondy eńbek birjasynda jáne óńiraralyq oqý ortalyqtarynda onlain oqytý kýrstaryn uiymdastyrý; jetekshi IT-ortalyqtaryn tarta otyryp, bolashaqtyń IT-mamandyqtaryn daiyndaý. Byltyr ekonomikamyzǵa IT-mamandarynyń asa qajet ekendigin kórsetip berdi», - dedi vitse-ministr Májiliste jumyskerlerdi qaita oqytý jáne olardyń daǵdylaryn turaqty jetildirý jónindegi jańa tásilderge arnalǵan dóńgelek ústel otyrysy barysynda.
Onyń atap ótýinshe, aldaǵy 5 jylda 210 myń adamdy oqýmen qamtý jáe olardyń jumysqa ornalasý kórsetkishin 80 paiyzǵa deiin jetkizý josparlanyp otyr.
«Osylaisha, ministrlik múddeli organdarmen birlesip, bilim jáne daǵdylar alý tetikterin jetildirý boiynsha júieli jumys istep jatyr», - dedi Erjan Birjanov.
