Elimizde eldi mekenderdi sý basý deregi tirkelgen joq. Bul týraly QR Ishki ister ministriniń orynbasary Iýrii Ilin aitty, dep habarlaidy QazAqparat.
«2020 jylǵy 24 naýryzda Qazaqstan Respýblikasynyń aýmaǵynda eldi mekenderdi sý basý jaǵdaiy tirkelgen joq. Ózende keptelis boldyrmaý maqsatynda muz qopsytý jumystary júrgizilýde. Jalpy respýblika boiynsha ózenderde 14 tonna jarylǵysh zattardy qoldana otyryp, 123 muz jarý jumystary júzege asyryldy», - dedi ol.
Onyń dereginshe, Nur-Sultan, Aqmola, Pavlodar, Shyǵys Qazaqstan jáne Qaraǵandy oblystarynda sý tasqyny jaǵdaiyn anyqtaý maqsatynda aerovizýaldy jáne jerústi zertteýler júrgizilýde. Elimizdiń óńirlerinde 165,3 shaqyrym qorǵaý bógetterin salý jáne jóndeý, 417,2 shaqyrym sý tasqyny qaýpi bar ózenderdiń jaǵalaryn bekitý, túbin tereńdetý, túzetý, 186,7 shaqyrym sý burý arnalaryn ornatý boiynsha sý tasqynyna qarsy jumystar jalǵasýda. Sý tasqynynyń aldyn alý jáne olardyń saldaryn joiý úshin 14 myń tonna janar-jaǵarmai, 190 myń tonna inertti materialdar, bir millionnan astam qap jáne 51 tonna kóleminde jarylǵysh zattar qory daiyndaldy.
Sonymen qatar ol BAQ ókilderiniń saýalyna orai elordanyń sý qoimasyndaǵy sý mólsherine qatysty derektermen bólisti.
«Sý qoimasyndaǵy sý kólemin eń tómengi shekke deiin tómendetý jumystaryn jalǵastyryp jatyrmyz. Qazirgi ýaqytta elorda sý qoimasy 52 paiyzǵa deiin tolyp tur. Qazgidromettiń sońǵy derekterine sáikes qar men ylǵal qorynyń kólemi aýa raiynyń qolaily bolýyna bailanysty aitarlyqtai qysqardy», - dedi I.Ilin.
Aita keterligi, Ishki ister ministrliginde jalpy sany 9 myń adam men 1,5 myńnan astam birlik tehnikadan turatyn arnaiy kúshter men quraldar toby quryldy. Sý tasqyny jaǵdaiy yqtimal kúrdelengen kezge basqa óńirlerdiń qosymsha jeke quramnan 2 044 adam, 214 birlik tehnika, 30 júzý quraly jáne 86 motopompa kúshteri men quraldary jedel den qoiý úshin ázirlikte tur.
