Qazaqstandyq óner iesi, kompozitor ári prodiýser Qanat Aitbaev jalǵyz qyzy Raýshanǵa arnap jańa án shyǵardy. Dimash Qudaibergenniń ákesi perzentine degen ákelik aq tilegin «Baq súisin mańdaiyńnan!» atty týyndy arqyly jetkizgen, dep habarlaidy ult.kz.

Ánniń áýenin Qanat Aitbaevtyń ózi jazsa, sóziniń avtory -aqyn, jýrnalist Baýyrjan Babajanuly.

Jańa týyndyǵa arnaiy beinebaian da túsirilgen. YouTube jelisinde jaryq kórgen klipke Raýshannyń qyz uzatý toiyndaǵy áserli ári estelikke toly kadrlar engizilgen. Beinebaiannan áke men qyz arasyndaǵy erekshe jylylyq pen qimastyq sezimi anyq baiqalady.

Jeli qoldanýshylary da jańa ánge jyly lebizderin bildirip, týyndynyń ákelik mahabbat pen shynaiy sezimge toly ekenin atap ótti.

"Ákesiniń qyzyna degen sheksiz mahabbatyn jetkizgen keremet án", "Raýshanǵa degen aq tilegi men ystyq yqylasy sezilip tur", "Án de, beinebaian da óte áserli shyqqan", – dep jazdy tyńdarmandar.

Aita keteiik, prezident atynan Qanat Aitbaevqa memlekettik nagrada tabystaldy. 

Qanat Aitbaev kim? 

Qanat Aitbaev - qazaqstandyq ánshi, kompozitor, prodiýser jáne mádeniet salasynyń ókili. Ol kópshilikke álemge tanymal ánshi Dimash Qudaibergenniń ákesi retinde de jaqsy tanys.

Qanat Aitbaev uzaq jyldar boiy mýzyka salasynda eńbek etip, án jazý, oryndaýshylyq jáne prodiýserlik baǵyttarmen ainalysyp keledi. Onyń jary — ánshi Svetlana Aitbaeva. Otbasynda Dimash, Mansur jáne Raýshan esimdi úsh balasy bar.

Óner iesi balalarynyń shyǵarmashylyq jolyna qoldaý kórsetip, ásirese Dimash Qudaibergenniń kásibi qalyptasýyna jáne halyqaralyq sahnaǵa shyǵýyna úlken úles qosqan tulǵalardyń biri retinde atalady.