Elimizde dári-dármektiń shekti baǵasy bekitiledi. Shekti baǵa júiesi qabyldanǵan Bolgariiada dári baǵasy elimizdegi baǵadan 45 paiyzǵa arzan. Bul jaiynda Úkimet otyrysynda QR Densaýlyq saqtaý ministri Eljan Birtanov aitty, dep habarlaidy Baq.kz tilshisi.
«Memleket basshysy halyqqa Joldaýynda biyl jyl sońyna deiin barlyq dári-dármek ónimderiniń baǵasyn retteý týraly tapsyrma bergen bolatyn. Ministrlik ulttyq dárilik saiasatty júzege asyrý boiynsha jospar ázirledi. Búgingi kezde preparatqa esh baqylaýsyz baǵa qoiý júiesi qalyptasqan. Buǵan óndirýshilerdiń dárige kez kelgen baǵany belgileýi dálel. Sondai-aq, dárihanalar sol preparattarǵa qalaǵanynsha baǵa qosýǵa quqyly. Osynyń saldarynan bir qaladaǵy dárihanalardaǵy dári baǵasynyń aiyrmashylyǵy 20 paiyzǵa jetýi múmkin. Al naryqta dárilerdiń jetispeýshiligi baiqalsa, qosylǵan baǵa kólemi 200 paiyzǵa deiin jetedi. Mysaly, shekti baǵa júiesi bekitilgen Bolgariiada dárilik zattardyń baǵasy elimizdegi baǵadan 45 paiyzǵa arzan», - dedi Birtanov.
Ministr dári baǵasyn basqa elderdegi baǵalarmen salystyrý kerektigin jáne shekti baǵany bekitý qajettigin aitty. Sondai-aq, Birtanov dári-dármek baǵasyn retteý týraly zań jobasyn ýaqyttyń tyǵyzdyǵy men áleýmettik mańyzyna qarai biyl emes, kelesi jyldyń basynan kúshine engizýdi qarastyrýdy surady.
«Atameken» UKP Basqarma tóraǵasynyń orynbasary Nurjan Áltaev dárilik zattarmen qamtamasyz etý baǵdarlamasyn tereńirek zertteý kerektigin aitty. Óz kezeginde QR Premer-ministri Baqytjan Saǵyntaev bul máseleniń óte sezimtal ekenin atap, degenmen zań jobasynyń parlamentke qyrkúiek aiynda joldanatynyn jetkizdi. Sondyqtan 1,5 aida talqylap, kelisip, úlken jumys atqaryp úlgerý kerektigin basa aitty. Sondai-aq, Saǵyntaev ministrge óńirlerge dári-dármektiń ýaqytyly jetkizilýin qamtamasyz etetin mehanizmdi durys ázirleýdi tapsyrdy.
Jáne de 1 shildeden bastap elimizde meditsinalyq saqtandyrý júiesiniń engizilgeni málim. Ol úshin búkil Qazaqstan boiynsha aqparattyq júieni damytý kerek.
«Búgingi tańda respýblika boiynsha densaýlyq saqtaý uiymdarynyń kompiýterlik tehnikamen jabdyqtalýy orta eseppen 74 paiyzdy qurap otyr. 2017 jyldyń basynda kórsetkish 34,3 paiyzdy quraǵan edi», - dedi Birtanov.
Baqytjan Saǵyntaev oblys basshylaryna meditsinalyq mekemelerdiń kompiýtermen jáne internetpen qamtamasyz etilýin baqylaýda ustaýdy tapsyrdy.
