Qazaqstanda COVID-19 boiynsha jańa statistika 1 tamyzdan bastap júrgiziledi. Bul týraly Densaýlyq saqtaý ministri Aleksei Tsoi málim etti, dep habarlaidy "Ult aqparat".
«Jinaqtalǵan klinikalyq tájiribelerdi zerttei otyryp, biz osy aýrýlardyń (KVI men pnevmoniia) uqsastyǵy baryn atap ótemiz. Sol sebepti olardy emdeýdiń biryńǵai taktikasyn qoldaný kerek dep esepteimiz. 11 shildede Densaýlyq saqtaý ministrligine Dúniejúzilik densaýlyq saqtaý uiymynyń COVID-19 jaǵdailaryn jańa formatta klassifikatsiialaý jáne tirkeý boiynsha resmi habarlamasy kelgenin atap ótkim keledi», - dedi Aleksei Tsoi OKQ-da ótken baspasóz máslihatynda.
Ministrdiń aitýynsha, búgingi tańda Qazaqstanda COVID-19 jaǵdailary zerthanalyq turǵyda dáleldengen málimettermen ǵana júrgiziletinin jetkizdi.
«Áitse de, maýsym aiynyń úshinshi onkúndiginen bastap qozdyrǵyshy aiqyndalmaǵan, iaǵni zerthanalyq turǵyda rastalmaǵan pnevmoniia virýsynyń ósimi baiqaldy. COVID-19 indetin juqtyrý men ólim-jitim statistikasy málimetterdiń eki kózinen quralady: COVID-19 jaǵdaiynyń zerthanalyq turǵyda rastalǵan málimetteri men aiqyndalmaǵan virýsty pnevmoniia boiynsha málimetter. Halyqaralyq aýrýlar kvalifikatsiiasynyń jańa kodyn qoldana otyryp, COVID-19 kodtaýyna tolyq ótý 1 tamyzda bastalady», - dedi ol.
