Birjalyq saýdanyń Biryńǵai qaǵidalary bekitiledi. Bul týraly Májilistiń jalpy otyrysynda birjalyq saýdany damytý jáne jetildirý máseleleri boiynsha zań jobasyn talqylaý kezinde Saýda jáne integratsiia ministri Baqyt Sultanov málim etti, dep habarlaidy QazAqparat.
«Qazirgi ýaqytta taýar birjalary brokerler men dilerlerdi akkreditteýdi, sondai-aq satyp alýshylar men satýshylardyń bir birjadan ekinshisine aýysýyn qiyndatatyn ártúrli talaptarmen ózderiniń ishki birjalyq saýda erejelerin belgileidi. Básekelestikti jáne taýar birjasyna teń qoljetimdilikti arttyrý maqsatynda zań jobasynda birjalyq saýdanyń Biryńǵai qaǵidalaryn bekitý kózdelgen. Sondai-aq onda: brokerler men dilerler úshin diskriminatsiialyq sharttar men erejelerdi alyp tastaý jónindegi normalar, satyp alýshylar men satýshylar úshin saýda sharttary men rásimderin aýystyrmastan birjany erkin ózgertý múmkindigi qarastyrylǵan», - dedi B. Sultanov.
Onyń aitýynsha, bul rette, Biryńǵai qaǵidalarmen olarǵa jekelegen talaptar qoia otyryp, taýarlar men
saýda-sattyqty sektsiialar boiynsha bólý belgilenetin bolady.
«Sonymen qatar, zań jobasynda taýar birjasyna brokerlerdiń jasalǵan kelisimderiniń kólemine qarai saralanǵan birjalyq alym belgileý quqyǵy kózdelgen. Engiziletin norma turaqty saýda júrgizetin satýshylar men satyp alýshylarǵa birjalyq alym stavkalaryna jeńildik alýǵa múmkindik beredi, bul olardyń birjalyq saýda kólemin ulǵaitýǵa múddeliligin arttyrady», - dedi vedomstvo basshysy.
Budan buryn habarlanǵandai, qazirgi ýaqytta Qazaqstanda 19 taýar birjasy litsenziialanǵan.
