Ulttyq bank tóraǵasynyń orynbasary Áliia Moldabekova qazaqstandyqtardyń depozitteri týraly aitty, dep habarlaidy QazAqparat.
«COVID-19-ben aýyrǵandar sanynyń ósýi ishki naryqqa aitarlyqtai áser etip jatqan joq. Shetel valiýtasyna degen asa úlken suranys baiqalmaidy. Valiýta naryǵyndaǵy saýda-sattyq kólemi karantinnen keiingi kezeń sheginde kúnine 90-130 mln AQSh dollarymen qalyp otyr. Aityp ótkenimizdei, teńge baǵamy irgeli faktorlardyń serpinine qarai qalyptasady. Kúzden beri ulttyq valiýta serpinine arzandap bara jatqan munai men damýshy elderdiń valiýtalary úshin táýekelderdiń kúsheiýi az da bolsa áser etýde», – deidi Áliia Moldabekova.
Qyrkúiektiń basynan bastap bir barrel úshin munai baǵasy $45,6-dan $42,3-ǵa deiin tómendedi. Osy kezeńde damýshy elderdiń valiýtalaryna da qysym kórsetildi. Mysaly, AQSh dollaryna qatysty túrik lirasy 7,3%-ǵa, rýbl 5,2%-ǵa, braziliia realy 2,2%-ǵa álsiredi.
«Jalpy, teńgege qatysty qubylmalylyq qalypty naryqtyq jaǵdai. Naryq irgeli faktorlardyń serpinine jáne saýda-sattyqtaǵy suranys pen usynysqa qarai qalyptasady, onda naryq oiynshylary shetel valiýtasyna qajettilikke bailanysty baǵam belgileý protsesine qatysady. Ulttyq Bank aiyrbastaý baǵamynyń jai-kúiine monitoring júrgizýdi jalǵastyrýda. Eger baǵam turaqsyzdanyp, kúrt kóteriletin bolsa, qarjylyq turaqtylyqty qamtamasyz etý úshin aralasýǵa daiyn», – dep atap ótti bank ókili.
