Ekologiia, geologiia jáne tabiǵi resýrstar ministri Maǵzum Myrzaǵaliev elimizde balyq sharýashylyǵyn yntalandyrýdyń basty jospary bekitilgenin aityp berdi, dep habarlaidy QazAqparat.
«Balyq sharýashylyǵy álemde de, Qazaqstanda da qarqyndy damyp kele jatqan áleýetti baǵyttardyń biri. Mamandardyń pikirinshe, bizdiń elimiz 600 myń tonnaǵa deiin balyq ósirýge bolady. Qazirdiń ózinde ósirilgen balyq kólemi boiynsha oń dinamika baiqalýda. Onyń óndirisi sońǵy úsh jylda 1,7 ese artty», - dedi ministr OKQ-da ótken baspasóz máslihatynda.
Onyń aitýynsha ministrlik balyq sharýashylyǵyn damytý baǵdarlamasyn ázirlegen. Baǵdarlama ótken aptada Úkimetpen maquldanǵan.
«Baǵdarlamaǵa sáikes 2030 jylǵa qarai balyq ósirý kólemin jylyna 9 myń tonnadan 270 myń tonnaǵa deiin, iaǵni 30 ese arttyrý josparlanýda. 545 jańa balyq ósirý sharýashylyǵy qurylyp, jumys istep turǵan 323 sharýashylyq tolyq jobalyq qýatqa aýysady. Olardy iske asyrý úshin 10 jyl ishinde 345 mlrd teńge jeke investitsiia tartý kózdelip otyr», - dedi ol.
Ministr 2020 jyly zańnamany jetildirý aiasynda balyq resýrstaryn paidalaný úshin jyldyq tólemniń ornyna toqsandyq tólem engizilgenin eske saldy. Sonymen qatar balyq ósirý úshin 49 jyl merzimge shart jasasý múmkindigin bere otyryp, balyq sharýashylyǵyna arnalǵan sý qoimalaryn balyq aýlaýdan balyq ósirýge berý qaǵidalary bekitilgen. Odan bólek balyq ósirý sharýashylyqtaryn sý qorǵaý beldeýine ornalastyrý boiynsha shekteýlerdi alyp tastaý, sondai-aq biznesti aýyl sharýashylyǵy maqsatyndaǵy jerlerde balyq ósirý sharýashylyqtaryn salý kezindegi shyǵyndardy óteýden bosatý jóninde normalar qabyldanǵan.
«Ministrlik zańnamany jetildirý, sapaly balyq ósirý materialdarymen, jemmen, budan basqa, kadrlyq jáne ǵylymi qamtamasyz etý boiynsha tiisti jumys júrgizýdi josparlaýda. Óz kezeginde, sýbsidiialar túrinde memlekettik qoldaý sharalaryn kórsetý, onyń ishinde balyq sharýashylyǵy baptaryna jeke nysanaly qarajat bólý arqyly jumystar júrgiziledi. Osylaisha, josparlanǵan sharalardy iske asyrý 10 jyl ishinde 2,2 trln teńgege 1,1 mln tonna balyq ósirýge múmkindik beredi. Ekinshiden, balyq ónimderin ishki tutynýdy jylyna 134 myń tonnaǵa deiin ulǵaitýǵa bolady. Úshinshiden, eksporttyq túsimdi 430 mln AQSh dollaryna deiin ulǵaitýǵa qol jetkize alamyz. Tórtinshiden, forel jáne bekire tuqymdas balyq óndirisin ulǵaitý esebinen import kólemin 45 myń tonnadan 25 myń tonnaǵa deiin tómendetýge múmkindik beredi», - dedi ol.
