Qazaqstanda balalar men jasóspirimderdiń kitap oqýǵa qyzyǵýshylyǵyn arttyrý maqsatynda arnaiy tujyrymdama daiyndaldy. Bul týraly QR Mádeniet jáne sport ministriniń orynbasary Nurǵisa Dáýeshov málim etti, dep habarlaidy QazAqparat.
«El bolashaǵynyń baiandy bolýy jas urpaqtyń bilim-biligine de bailanysty. Osy oraida Memleket basshysynyń bastamasymen bizdiń ministrlik jańa bastamany qolǵa alyp otyr. Qazirgi ýaqytta elimizde 11 myńnan astam kitaphana jumys isteidi, onyń 4 myńǵa jýyǵy bizdiń ministrlikke qarasty. Biyl balalar men jasóspirimderdiń kitap oqýyn qoldaý jyly aiasynda balalarǵa arnalǵan kitaptardyń sany men sapasyn arttyrýdy kózdep otyrmyz. Óitkeni bul zaman talaby jáne kitap oqityn balalarda tańdaý bolýy tiis», - dedi Nurǵisa Dáýeshov.
Vitse ministrdiń aitýynsha, Qazaqstanda balalar men jasóspirimderdi kitap oqýǵa qyzyǵýshylyǵyn arttyrý maqsatynda arnaiy tujyrymdama ázirlendi.
«Ol tujyrymdaǵa sáikes, biyl elimizde balalar men jasóspirimderge arnalǵan túrli baǵyttaǵy 10 myńǵa tarta is-shara ótpek. Jáne jyldyń ár aiy bir taqyrypqa arnalady. Mysaly, osy naýryz aiy «Ertegiler álemi» bolsa, qyrkúiekte ata-anamen birge kitap oqý sharasyn ótkizýdi oilastyryp otyrmyz. Sondai-aq, biyl aitýly jyl aiasynda balalarǵa arnalǵan 33 ádebi týyndy shyǵarý jospary tur», - deidi ministr orynbasary.
