Qazirgi ýaqytta Qazaqstan boiynsha 17 asyrap alýshy ata-analar mektebi bar. Bul týraly Bala asyrap alý jónindegi ulttyq agenttik basshysy Lázzat Júsipova aitty, dep habarlaidy QazAqparat.
«Bala asyrap alý jónindegi ulttyq agenttik 2016 jyldan bastap jumys isteidi. Bizdiń mindetimiz - bolashaq asyrap alýshy ata-analardy daiarlaý, olarǵa bilim berý jáne ata-analyq quzyrettiligin arttyrý. Bizdiń joba búkil Qazaqstan boiynsha usynylǵan. 17 aimaqta bólimshemiz bar. Sondai-aq, Qazaqstan boiynsha 17 asyrap alýshy ata-analar mektebi bar. Tórt jyl ishinde bizdiń yqpal etýimizben 801 asyrap alýshy otbasy paida boldy, 1153 bala patronattyq, qamqorshylyq siiaqty ártúrli formadaǵy otbasylarda tárbielenýde», - Lázzat Júsipova.
Ol balalardy asyrap alatyn ata-analardy oqytý ne úshin mańyzdy ekenin aitty.
«Qamqorshylyqqa alǵan balalaryn qaitadan jetimder úiine ótkizetin ata-analar bar. Jyl saiyn asyrap alýshy ata-analar 200-250-ge jýyq balany balalar úiine qaitarady. 2019 jyldyń qorytyndysy boiynsha, bizdiń joba aiasynda oqyǵan ata-analar 19 balany jetimder úiine qaitarǵany anyqtaldy. Osy jaǵdaidan keiin bul máselege erekshe nazar aýdara bastadyq. Qazir patronat ata-analarǵa kásibi qoldaý uiymdastyryldy. Bizde otbasylarǵa bazalyq, daǵdarystyq jáne tótenshe kómek júiesi bar. Bizdiń mamandar balanyń otbasyna qalai beiimdelip jatqanyn kórý úshin qońyraý shalyp, kezdesedi. Balany otbasyna beiimdeý protsesi óte uzaqqa sozylady, sebebi bala ol otbasyǵa jany jaralanyp keledi», - deidi ol.
Sondai-aq, ol bala asyrap alýshylar mektebi aptasyna 3 saǵattan turatyn 14 sabaqty quraitynyn aitty.
«Iaǵni, bala asyrap alýshylar bul mektepke úsh jarym ai barý kerek. Oqý barysynda bala asyraý oiynan ainyp qalatyndar bar. Bul - bala asyrap alǵannan keiin ainyp qalýǵa qaraǵanda jaqsy», - deidi ol.
