Qazirgi ýaqytta korona-taksi pnevmoniia jáne koronavirýstan úi jaǵdaiynda emdelip jatqan naýqastarǵa qyzmet kórsetedi, dep habarlaidy "Ult aqparat".
Densaýlyq saqtaý basqarmasynyń málimetinshe, atalmysh qyzmet túri el boiynsha birinshi ret Atyraý oblysynda uiymdastyrylyp otyr. Ázirge kovid-taksi túngi kezekte qyzmet kórsetip jatyr. Aldaǵy ýaqytta atalmysh taksi sanyn kóbeitý josparlanǵan.
Atyraý oblystyq jedel járdem qyzmeti stansasy direktorynyń mindetin atqarýshy Nargiz Baimoldaevanyń aitýynsha, qazirgi ýaqytta jedel járdem qyzmetine túsip jatqan shaqyrtýlar óte kóp.
«Al, korona-taksi qyzmeti júktemeni azaitýǵa yqpal etýde. Kovid taksi tolyqqandy brigadamen teń dárejede meditsinalyq qyzmet kórsete alady. Kovid taksi koronavirýs, pnevmoniiaǵa shaldyqqandarmen birge, qyzýy kóterilip turǵan naýqastardyń shaqyrtýyna da barady. Eger koronavirýsqa shaldyqqan naýqas dárigerdiń qabyldaýynan shyǵyp, úiine jete almai tursa, kovid-taksi qyzmetin paidalana alady. Kovid taksidiń brigadasy júrgizýshi men feldsherden turady. Ókinishke qarai, bizdiń de qyzmetkerlerimizdiń arasynda naýqastanyp jatqandar bar. Qazirgi ýaqytta qolda bar kúshti maksimaldy túrde tiimdi paidalanýǵa tyrysyp otyrmyz», - deidi Atyraý oblystyq jedel járdem qyzmeti stansasy direktorynyń mindetin atqarýshy Nargiz Baimoldaeva.
Erekshe atap óterligi, kovid taksi júrgizýshileri qajet jaǵdaida alǵashqy meditsinalyq kómek kórsete alady. Olar bazalyq reanimatsiialyq kómek boiynsha oqytýdan ótken.
Sonymen birge, pnevmoniia, koronavirýsqa shaldyqqan naýqastar kovid taksi qyzmetin dári-dármek tasymaly úshin de paidalana alady.
Aita ketelik, pandemiia bastalǵaly beri Atyraýda jedel járdem shaqyrtý kóbeigen. Buryn táýligine 700-800 ret shaqyrǵan bolsa, qazirgi jaǵdaida oblys boiynsha shaqyrý sany táýligine 1300-ge deiin artqan.
Eske sala keteiik, biz buǵan deiin elimizde korona-taksi qyzmeti iske qosylatynyn habarlaǵan bolatynbyz.
