Foto: Májilis
Búgin Májilistiń jalpy otyrysynda depýtat Nartai Sársenǵaliev elimizde ajyrasqan ár 10 otbasynyń jeteýinde janjal lýdomaniia saldarynan shyǵatynyn aitty, dep habarlaidy Kazinform agenttigi.
«Elimizde qazir 350 myńnan astam adam qumar oiynnyń „inesine“ otyrǵan. 2019 jylmen salystyrǵanda, byltyr elimizde qumar oiyndarǵa bás tigý 40 ese kóbeigen. Býkmeker keńselerdiń bir jyldyq qarjy ainalymy 1 trln teńge bolǵan. Lýdomaniia dertine shaldyqqan 174 myń jas qazaqstandyq 36 mlrd teńgege bás tikken. Qazir qumar oiynnyń shyrmaýyna túskender shetinen qylmysker bolyp jatyr. Byltyr 157 myńnan astam qylmys jasalsa, sonyń 20 paiyzy — qumar oiynǵa qunnyqqandardyń moinynda. Sýitsid jasaǵan 3676 otandasymyzdyń ár besinshisi lýdomaniia dertine shaldyqqan degen derek keldi. Bul lýdomaniia bir adamnyń taǵdyryn emes, tutas otbasylardy búldiredi. Elimizde ajyrasqan ár 10 otbasynyń jeteýinde janjal lýdomaniia saldarynan shyqqan. Al biz osymen qalai kúresip jatyrmyz? Elimizde qoǵamdyq kóliktiń syrtyn, turǵyn úilerdiń qasbetin túgeldei qumar oiyndardyń jarnamasyna berdik», — dedi N. Sársenǵaliev.
Sonymen qatar depýtat ulttyq sport alańdary, kókpar men báigeniń bári totalizatordyń ornyna ainalyp ketkenin aitty.
«Ultymyzdy saqtaimyz dep júrgende ulttyq sportymyzdy qumar oiynnyń alańyna ainaldyrý kimge kerek bolǵanyn suraǵym keledi. Ultymyzdy, jurtymyzdy qurtyp jatqan qumar oiyndardy túgel toqtatyn kez keldi ǵoi?!», — dedi Nartai Sársenǵaliev.
Óz kezeginde Premer-Ministrdiń orynbasary Tamara Dúisenova depýtat kótergen máselemen kelisetinin aitty.
«Bul taqyryp — óte ózekti. Oiyn biznesi týraly zań 2007 jyly qabyldanǵan. Ondaǵy normalar qazirgi ózgeristerge jaýap bere almaidy. Máselen, jarnamaǵa qarsy, balalardyń oiynyna eshqandai shekteý joq. Sondyqtan Parlament depýtattary bastamasymen engizilip jatqan túzetýlerdiń barlyǵyn quzyretti organdarmen birge qarap shyqtym. Bizneske tiisti shekteý salatyn 16 usynysty Ulttyq ekonomika ministrligimen pysyqtap jatyrmyz. Bul turǵyda 8 shekteý boiynsha jumystar aiaqtalýǵa jaqyn. Qalǵan 8-i keler aida qaralyp bolady. Osynyń bárin jinaqtap, Parlamentke kelemiz. Negizgi másele nede? Qazir shetel tájiribesin zerttep shyqtyq. Jalpy, oiyn tártibi bar eken. Oǵan sáikes oiynnyń ýaqytyna, stavka deńgeiine qatysty limiti bolýy kerek. Sondyqtan bul baǵytta tiisti shekteýlerdi qoiyp jatyrmyz», — dep túsindirdi Úkimet basshysynyń orynbasary.
Tamara Dúisenova qumar oiynnyń jarnamasyna tyiym salý máselesine de toqtaldy.
«Atap aitqanda, shetel tájiribesine qarasaq, bir de bir syrtqy jarnamada qumar oiyndaryn kórsetpeýi kerek. Sondyqtan jarnamaǵa shekteý jóninde tiisti normany belgiledik. Endi tek býkmeker keńsesiniń ishinde, sondai-aq sport telearnalarynda jarnama jasaýǵa bolady degen usynysty qarastyryp otyrmyz», — dedi ol.
