Foto: Sali Sabirov/UOK
Frantsiia astanasy Parij qalasynda ótip jatqan Olimpiada oiyndarynda sporttyq gimnastikadan kúmis medal jeńip alǵan Nariman Qurbanov jeńisten keiingi áserin bólisti.
"Snariadqa keldim de, kombinatsiia bastalar aldynda basqa eshteńe oilamai, tek jattyǵýdy sońyna deiin oryndadym. Is-qimyldyń bárin qalai sátti oryndap shyqqanymdy ózim de túsinbei turmyn. Uzaq jyldar boiy jasap júrgen kombinatsiiany avtomatty túrde oryndap shyqtym. Qazirgi olimpiadalyq tsikldi esepke alar bolsaq, men baǵdarlama sońynda jii qulaitynmyn. Bul meniń tehnikalyq nemese taktikalyq turǵydaǵy kemshiligim emes. Psihologiialyq turǵydan berilip qoiatynmyn. Búgin bar tájiribemdi jinap, eń mańyzdy týrnirde bilgenimdi túgel oryndadym. Sonyń nátijesinde osyndai jetistikke qol jetkizip otyrmyn", — dedi sportshy.
Sonymen qatar, Parij Olimpiadasynyń medali alǵash tanystyrylǵanda sonyń sýretin ózine saqtap qoiǵanyn, sol medalǵa qol jetkizýdi armandaǵanyn da atap ótti.
"Osy maýsymdaǵy árbir jarys aldynda sol sýretke qarap, osy medaldi qaitsem de alamyn dep aldyma maqsat qoidym. Mine, búgin sol maqsatqa jettim. Jáne sol maqsatqa jetý úshin jumys istedim. Elimizde bul medaldi qalai qabyldaitynyn, halyqtyń qalai qýanyp jatqanyn jaqsy túsinemin. Qazir bul medaldi ustaǵannan buryn elimizdiń qýanyp jatqanyn kórý — men úshin baqyt. Elime tarihi júlde syilaǵanym úshin baqttymyn", — dedi Qurbanov.
Esterińizge sala keteiik, keshe el qorjynyna Parij Olimpiadasynyń tuńǵysh kúmis júldesi tústi.
Ony sporttyq gimnastikanyń at snariadyndaǵy jattyǵýda Nariman Qurbanov jeńip aldy.
