Jambyl aýdany aýmaǵynda tabiǵatty qorǵaý bóliminiń politseileri zańsyz ań aýlaýmen ainalysqan 39 jastaǵy jergilikti turǵyndy qolǵa túsirdi, dep habarlaidy «Ult aqparat» Almaty oblysynyń politsiia departamentine silteme jasap.
Arnaiy reid barysynda Yntymaq aýylynyń mańyndaǵy ańshylyq alqap aýmaǵynda qolyna túsken azamat Resei Federatsiiasynyń týmasy bolyp shyqty. Ol tiisti ruqsaty joq bolǵanyna qaramastan zańsyz ań aýlaǵan.
«Er adam óziniń myltyǵymen 2 Sibir eligin zańsyz atyp alǵan. Osylaisha janýarlar álemine 2 083 500 teńge kóleminde ziian keltirgen. Atalǵan fakti sotqa deiingi tergeýdiń biryńǵai tizilimine tirkelip, QR Qylmystyq kodeksiniń 337-baby boiynsha tergeldi. Barlyq zattai dálelder tárkilendi. Ustalǵannan keiin ańshy sot aldynda jaýap berdi. Sot qylmystyq-atqarý júiesi mekemelerinde jazasyn ótei otyryp, ań aýlaýmen ainalysý quqyǵynan 3 jyl merzimge aiyra otyryp, 1 jyl 6 aiǵa bas bostandyǵynan aiyrýǵa úkim shyǵardy», - dedi Almaty oblystyq politsiia departamenti ókilderi.
Tabiǵatty qorǵaý politsiiasynyń qyzmetkerleri únemi ań jáne balyq aýlaý erejelerin saqtaý, brakonerlik faktilerdiń aldyn alý boiynsha reidter júrgizedi. «Bul is-sharalar múddeli uiymdardyń ókilderimen birlesip ótkiziledi. Jyl basynan beri oblysta 132 qylmystyq is qozǵalyp, 1033 tabiǵat qorǵaý zańnamasyn buzý áreketi anyqtaldy», - deidi Almaty oblysy politsiia departamenti tabiǵatty qorǵaý politsiiasynyń aǵa inspektory, politsiia maiory Serik Baiǵozinov.
