QR Parlamenti Májilisiniń jalpy otyrysynda «Qazaqstan Respýblikasynyń keibir zańnamalyq aktilerine kóshi-qon protsesterin retteý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, – dep habarlaidy «Ult aqparat».
Zań jobasy Qazaqstan Respýblikasynyń 2017-2021 jyldarǵa arnalǵan kóshi-qon saiasatynyń tujyrymdamasyna jáne ony iske asyrý jónindegi is-sharalar josparyna sáikes ázirlengen. Zań jobasynyń mindetteri kóshi-qon zańnamasyn tiisti baǵyttar boiynsha jetildirýge negizdelgen. Osy oraida, Qazaqstanǵa kelgen etnikalyq repatrianttar men qonys aýdarýshylar úshin qolaily jaǵdailar jasaý; el ekonomikasynyń qajettilikterin qamtityn qolaily investitsiialyq klimat qurýǵa baǵyttalǵan syrtqy eńbek kóshi-qonynyń tiimdi júiesin qurý; halyqaralyq ozyq tájiribeni eskere otyryp, zańsyz kóshi-qonnyń aldyn alý, kóshi-qon protsesterin retteý salasyndaǵy normativtik-quqyqtyq bazany keńeitý baǵyttary eskerilgen.
«Qoldanystaǵy zańnamaǵa sáikes, etnikalyq qazaqtar oralman mártebesin alý úshin Qazaqstan táýelsizdik alǵanǵa deiin shet memlekettiń aýmaǵynda turý faktisin rastaýǵa tiis. Is júzinde 1991 jyldan keiin dúniege kelgen etnikalyq qazaqtar mundai qujattardy bere almaidy. Osyǵan bailanysty etnikalyq qazaqtyń buryn QR azamaty bolmaǵandyǵy basty kriterii bolady» dedi QR Eńbek jáne halyqty áleýmettik qorǵaý ministri Birjan Nurymbetov.
Ekinshiden, qandas baýyrlarymyzǵa qolaily jaǵdai jasaý úshin, sondai-aq ótkiziletin qujattardyń tizbesi qaitalanýyna bailanysty oralmandardyń turaqty túrde turýǵa ruqsat alýǵa jáne Qazaqstan azamattyǵyn alýǵa qujattardy bir mezgilde berý múmkindigi qarastyrylady. Qonys aýdarýshylardy ornalastyrý, jumyspen qamtý jáne beiimdeý jónindegi áleýmettik qyzmetter keshenin usyný maqsatynda qandastarǵa ǵana emes, qonys aýdarýshylarǵa da beiimdeý jáne yqpaldastyrý qyzmetterin kórsetý jónindegi ortalyqtardyń fýnktsiialary keńeitiletin bolady.
