QR Ishki ister ministri Marat Ahmetjanov elge kelip jatqan reseilikterge qatysty birde-bir quqyq buzýshylyq tirkelmegenin málim etti, dep habarlaidy QazAqparat.
Búgin Marat Ahmetjanov Shyǵys Qazaqstan oblysynyń turǵyndarymen eseptik kezdesý ótkizý úshin Óskemen qalasyna keldi. Jiyn barysynda azamattardyń biri Reseiden elge kelip jatqan migranttardyń kóbeiýine qatysty alańdaýshylyq bildirdi.
«Rasymen de, sońǵy jaǵdailarǵa bailanysty kórshi elden Qazaqstanǵa kelýshiler artty. Biz quqyq qorǵaý organy retinde olardyń qaýipsizdigin qamtamasyz etýge mindettemiz. Alaida sheteldikter tarapynan azamattarymyzdyń tynyshtyǵyn buzyp, qoǵamdyq tártipti saqtamaǵandar anyqtalsa onda zań sheńberinde tiisti shara qabyldaimyz», - dedi QR Ishki ister ministri.
Onyń aitýynsha, ózge memleketten kelgenderdiń barlyǵy Qazaqstannyń ishki zańyna baǵynýy tiis.
«Qazirgi ýaqytta reseilikter tarapynan birde-bir qylmys jáne ákimshilik quqyq buzýshylyq tirkelmedi. Jalpy jyl saiyn elimizge álemniń túkpir-túkpirinen 6 millionnan astam adam keledi. Migratsiialyq politsiia qyzmetkerleri óz jumystaryn úzdiksiz atqarýda. Sondyqtan alańdaýǵa esh negiz joq», - dedi Marat Ahmetjanov.
